சில பல வேலைகளால் நிகழ்ந்த தாமதத்துக்கு மன்னிக்கவும்.

காலிறுதி ஆட்டங்களில் முதலாவதாக பிரேசிலும் நெதர்லாந்தும் மோதின.

வழக்கமான பிரேசில் அணியை விட, இந்த வருட அணியின் மீது அதிக நம்பிக்கை இருந்தது. ஜிகினா வேலைகள், தனி நபர் ஆட்டம் பொன்றவற்றை கோச் டுங்கா அரவே நீக்கி இருந்தார். கிட்டத்தட்ட தேர்ந்த ஐரோப்பிய கிளப் அணியைப் போலத்தால் பிரேசில் செயல்பட்டு வந்தது. இதனால், இரண்டாம் சுற்று வரையிலான ஆட்டங்களில் பிரேசிலின் தற்காப்பு கன கச்சிதமாய் அமைந்திருந்தது.

நெதர்லாந்தோ ரோபனின் வருகைக்குப் பின்னர்தான் சோபிக்கத் தொடங்கியிருந்தது. இருப்பினும், ரொபினோ, காகா, ஃபாபியானோ, நில்மார் போன்றோரின் தாக்குதல்களை டச்சு தற்காப்பு தாக்குப் பிடிக்குமா என்பது சந்தேகமாகவே இருந்தது.

ஆட்டம் தொடங்கிய முதல் ஐந்து நிமிடங்களுக்கு பிரேசில் நிதானமின்றி காணப்பட்டது. நிறைய ஃபௌல்கள். அதன் பின் சுதாதரித்துக் கொண்ட பிரேசில் அட்டாக், அடுத்த ஐந்து நிமிடங்களில் இரண்டு கோல் அடித்தது. அதில் முதலாவது ஆஃப்ஸைட் கோல். பத்தாவது நிமிடத்தில் ஃபெலிபே மெல்லோவின் பாஸ் ஆளில்லாத ரோபினோவை அடைந்த பின் கோலானது. மைதானத்தின் மத்தியில் இருந்து நேராக கோல் நோக்கி செலுத்திய பந்தை வேடிக்கை பார்த்தது டச்சு தற்காப்பு. எங்கே இங்கிலாந்து வீரர்களிடம் பாடம் பயின்றனரோ டச்சு வீரர்கள் என்று சந்தேகிக்க வைத்தது.

ரொபினோவின் இன்னொரு அற்புதமான முயற்சி பந்தை பெனல்டி ஏரியாவுக்குள் எடுத்துச் செல்ல, அதை வாங்கி கண நேரத்தில் Back heel-ஆல் ஃபாபியானோ காகாவிடம் அனுப்ப, Full Blooded curling drive ஒன்றை கோல் நோக்கி செலுத்தினார் காகா. கோல்கீப்பரின் அற்புதமான முயற்சி காகாவின் முதல் கோலை மறுத்துவிட்டது.

முதல் அரையின் முடிவில் ஒரு கோல் முன்னிலையில்தான் பிரேசில் இருந்தது என்றாலும், நெதெர்லாந்து ஆட்டத்தில் மீண்டு வர முடியும் என்று அப்போது தோன்றவில்லை.

பிரேசிலின் அட்டாக் நன்றாக இருந்தாலும் டிஃபென்ஸில் முந்தைய ஆட்டத்தில் காணக் கிடைத்த ஸ்திரம் அன்று இல்லை. இன்னொரு வினோதமான விஷயம்: ரோபனிடம் பந்து செல்லும் போதெல்லாம் அவர் வீழ்த்தப்பட்டார். அவர் நல்ல ஆட்டக்காரர்தான். அதற்காக அவரிடம் பந்து சென்றாலே கோலாகிவிடுமா என்ன? பிரேசிலின் இந்தப் பதற்றம் தேவையற்றது. வேறொரு ரெஃப்ரீயாக இருந்திருந்தால் முதல் அரையிலேயே சில பிரேசில் வீரர்கள் வெளியேற்றபட்டிருப்பர். சமயத்தில் ஸ்டேல் மேட்டில் மாட்டிய ராஜா போல ரோபனைச் சுற்றி நீலச் சட்டைகள் மயம். தன் அரையினுள் எண்ணற்ற முறை ரோபனை வீழ்த்தி ஃப்ரீ கிக்குகளை வாரி வழங்கியது பிரேசில்.

ரொபினோ போன்றோர் அமைதியாக ஆடாமல், சிங்கம் பட சூர்யா கணக்கில் எக்ஸ்ப்ரெஷன்களைக் காட்டி ரெஃப்ரீயையும் எதிர் அணியினரையும் முறைத்துக் கொண்டே இருந்தது அனாவசியம்.

53-வது நிமிடத்தில் நெதர்லாந்துக்குக் கிடைத்த ஃப்ரீ கிக்கில் சம்பிரதாயமாக ஸ்னைட்டரும், ரோபனும் காலால் பந்தைத் தொட்டதும், ஸ்னைடர் பந்தை கோல் நோக்கி கிராஸ் செய்தார். பந்தின் திக்கில் எதிர்பட்டவரெல்லாம் பிரேசில் வீரர்களே. பந்தை கோல்கீப்பர் ஜூலியோ சீஸார் கையால் குத்தி வெளியனுப்ப எம்புகையில், அவருக்கு மேலாய் ஃபெலிப்பே மெலோ எம்பினார். பந்து அவர் எம்பலுக்கு சற்று அதிக உயரத்தில் சென்று, அவர் தலையை வருடிக் கொடுத்தபடி கோல்கீப்பரை ஏய்த்து, கோலுக்குள் பிரவேசித்தது.

முதலில் own goal-ஆகக் கருதப்பட்ட இந்த கோல், பின்னால் ஸ்னைடரின் கோலாக அறிவிக்கப்பட்டுள்ளது.

ஆட்டம் சமமானதும் பிரேசில் நிதானத்தை சுத்தமாக இழந்தது. நெதர்லாந்தோ அதைக் கச்சிதமாய் பயன்படுத்தி பிரேசிலை நெருக்க ஆரம்பித்தது. சற்றைக்கெல்லாம் இன்னொரு கோல்.

ரோபனின் கார்னரை Kuyt தலையால் டீ-க்குள் அனுப்ப, ஸ்னைட்டரின் துல்லிய ஹெட்டர் 2-1 ஆக்கியது. அற்புதமான டீம் கோல்.

கடைசி 22 நிமிடங்களுக்கும் நெதர்லாந்தின் கையே ஓங்கியிருந்தது. ஃபாபியானோவை நீக்கி நில்மாரை அனுப்பியும் பிரயோஜனம் இல்லை. Own Goal அடித்த மெலோ திரும்ப ஊருக்குப் போக பயந்திருக்கலாம். ஒரேடியாய் டச்சு குடியுரிமை வாங்கி நெதர்லாந்தில் செட்டில் ஆகிவிடலாம் என்று நினைத்திருக்கலாம். இன்னொரு முறை ரோபனை அநியாயமாய் வீழ்த்தி ரெட் கார்டு வாங்கி வெளியேறினார்.  பதினொரு பேருடனேயே தடுமாறிக் கொண்டிருந்த அணி பத்து பேருடனா ஜெயிக்க முடியும்? கடைசி பத்து நிமிடங்களில் நெதர்லாந்து முன்னிலையை அதிகப்படுத்தாமல் இருக்கும்படி பார்த்துக் கொள்ளவே ப்ரேசிலுக்கு சரியாயிருந்தது.

பிரேசிலுக்கு அறாவது உலகக் கோப்பை இந்த ஆண்டு இல்லை.

மூன்றாவது ஆட்டத்தில் ஜெர்மெனியும் அர்ஜெண்டிவாவும் மோதின. மரடோனா, பெக்கன்பாயரைப் போல கேப்டன், கோச் என்று இரு நிலைகளில் அர்ஜெண்டினாவுக்கு உலகக் கோப்பை வாங்க வழி செய்வார் என்று பலரால் எதிர்பார்க்கப்பட்டது.

சென்ற உலகக் கோப்பையில் காலிறுதியில்தான் இந்த இரு அணிகளும் மோதின. பெனல்டி ஷூட் அவுட்டில் ஜெர்மனி வென்றது. இவ்வாண்டு அர்ஜெண்டினா பழி வாங்கும் என்று ஆக்டோபஸ் ஜோசியத்தைத் தவிர அனைத்தும் கூறின.

ஆட்டம் தொடங்கிய மூன்றாவது நிமிடத்தில் ஷ்வைன்ஸ்டைகரின் ஃப்ரீ கிக்கை முல்லர் தலையால் அடித்தார். பந்து சரியாக அவர் தலையில் படக் கூட இல்லை. கோல் கீப்பருக்கு கைக்கு சுலபமாக எட்டக் கூடிய தூரத்தில் அதிக வேகமின்றி வந்த பந்தை கவர முடியாமல் போனதால் ஜெர்மனி முன்னிலை பெற்றது.

1-0 என்றாலும் 87 நிமிடங்கள் இன்னும் இருந்தன. என்ன வேண்டுமானாலும் ஆகலாம்.

ஜெர்மனியின் பாஸிங் கன கச்சிதம். காற்று கூடப் புக முடியா வண்ணம் தற்காப்பும் இருந்தது. இரு அணிகளும் பல தாக்குதல்களைத் தொடுத்து வந்தன என்றாலும் வழக்கமாக அர்ஜெண்டினா ஆட்டம் காணக் கிடக்கவில்லை.

அர்ஜெண்டினாவின் ஆட்டங்களில் எது இல்லாத போதும் வேகத்துக்கு குறைவு இருககது. பந்து கிடைத்துவிட்டால் பறந்தடித்து கோல் நோக்கிச் செல்வதில் வல்லவர்கள். ஆனால் இன்றோ ஒவ்வொரு அர்ஜெண்டீன வீரரும் அவரை மார்க் செய்த ஜெர்மன் வீரரை விட ஒரு மாற்று குறைவான வேகத்திலேயே ஓடினார். பந்து கிடைத்த மாத்திரத்தில் அடிக்காமல், தயங்கித் தயங்கி ஆடியது போது, ஆடுவது அர்ஜெண்டினாதானா என்ற சந்தேகம் எழுந்தது.

முதல் பாதி முடிய சில நிமிடங்களுக்கு முன்னிருந்தே ஜெர்மனி முன்னிலையை தக்க வைத்தால் போதும் என்று ஆடத் தொடங்கிவிட்டது. One goal lead is non-existent, என்று பலர் கூறினாலும், பெரும்பாலான அணிகள் முன்னிலையை அடைந்ததும் தற்காத்து ஆடுவதே நிதர்சனமாய் நடக்கும் உண்மை. 1990-ல் பல முக்கிய ஆட்டங்களில் மரடோனாவின் அணி இப்படி ஆடித்தான் வென்றது.

இரண்டாம் பாதியிலும் இதே நிலை தொடர, அர்ஜெண்டினாவும் கோலடிக்க முழு முனைப்புடன் களமிறங்கியது. இதில் பாதகம் என்னவென்றால் கவனமெல்லாம் கோலடிப்பதில் இருக்க தற்காப்பு பலவீனமாகிவிடும். போதாக் குறைக்கு அர்ஜெண்டினா கோல்கீப்பரும் ரொம்பவே சுமாராக விளையாடிக் கொண்டிருந்தார். இதனால் அர்ஜெண்டினாவின் தாக்குதல் முடிந்த கணத்தில் ஜெர்மனி ஒரு தாக்குதலைத் தொடுத்தால் அதை அர்ஜெண்டினா எதிர்கொள்வது கஷ்டம். இங்கிலாந்து தோற்ற ஆட்டத்திலும் இதுவே நடந்தது.

இந்த ஆட்டத்திலும் இரண்டாம் பாதி முழுவதும் இதுதான் நடந்தது. விளைவு அடுத்தடுத்து க்ளொசாவுக்கு இரண்டு கோல்கள். மூன்று கோல் பிந்தங்கிய நிலையில் அர்ஜெண்டினா மீள்வது சாத்தியமே இல்லை என்ற நிலையில், ஏற்கெனவே சுமாராக ஆடிய வீரர்கள் சுரத்தின்று ஆட ஆரம்பித்தனர்.

வீடியோ கேம் கார் ரேசில் ஸ்டியரிங்கைத் திருப்பித் திருப்பி வாளாயிருக்கும் இடர்களைச் சுற்றிச் சுற்றி வண்டியை செலுத்தி முன்னேறுவது போலத்தான் ஜெர்மனியின் நான்காவது கோல் அமைந்தது. அர்ஜெண்டின வீரர்கள் சும்மாயிருக்க அவர்களைக் ஒற்றை ஆளாய் கடந்து வந்த ஷ்வைன்ஸ்டைகர், கோலருகில் இருந்த ஃப்ரெட்ரிச்சிடம் கொடுக்க ஸ்கோர் 4-0. மரண அடி.

அர்ஜெண்டினாவின் தோல்விக்கு மரடோனாவே காரணம் என்று சொல்ல முடியாது. அவர் என்னதான் களனமைத்தாலும் ஆடுவது வீரர்கள்தானே? வழக்கமாய் ஆடுவதைப் போல அரவே ஆடாவிடில் எந்த கோச்தான் என்ன செய்ய முடியும்? ஒரு அணி சுமாராக ஆடி இன்னொரு அணி சின்ன் அ சொதப்பல் செய்தாலே ஆட்டம் சாய்ந்துவிடும். இந்த ஆட்டத்திலோ ஒரு அணியோ மிகச் சிறப்பாக ஆட, இன்னொரு அணியோ படு கேவலமாய் விளையாடியது. விளையை சொல்லவும் வேண்டுமா என்ன?

எந்த நேரத்தில், “என்னதான் ஐரோப்பாவில் காசை தண்ணியாய் செலவழித்து கால்பந்தை வளர்த்தாலும் தென்னமெரிக்க வீரர்களின் ரேஞ்சே தனிதான்.”, என்று போன கட்டுரையில் சொன்னேனோ தெரியவில்லை. நான்கில் மூன்று அணிகள் வெளியேறிவிட்டன. அதுவும் ஐரோப்பிய நாடுடன் ஆடிய மூன்று அணிகளுக்கும் சங்கு.

நான்காவது ஆட்டத்தில் ஸ்பெயின், பாரகுவேயை எதிர்த்து ஆடியது.

போர்ச்சுகலை வென்ற அணியையே இந்த ஆட்டத்திலும் களமிறக்கினார் ஸ்பெயினின் கோச் Vicente del Bosque. பாரகுவேயோ ஜப்பானை வென்ற அணியில் ஆறு மாற்றங்கள் செய்திருந்தது. சாண்ட கிரஸ், பெனிடெஸ், பாரியோஸ் போன்ற முன்கள வீரர்களுக்கு துவக்க அணியில் இடமில்லை.

Under achievers tag-ஐ நீக்க ஸ்பெயினுக்கு நல்ல வாயப்பிருந்தது போலவே, Dream run-ஐத் தொடர பாரகுவேக்கும் நல்ல வாய்ப்பு.

முதல் பாதியின் ஸ்பெயினின் பாஸிங்க் கேமை விளையாட முடியாதபடி பாரகுவே குறிக்கீடு செய்தது. டேவிட் வியா போன்ற வீரர்கள் முன்னேற முடியாமல் நெருக்கப்பட்டனர். பாரகுவேயின் இரண்டு மூன்று லாங் ரேஞ்ச் முயற்சிகளில், பாரகுவே வீரருக்கும் பந்துக்குமான தூரம் இன்னும் சில செ.மீ குறைந்திருந்தால் கச்சித ஹெட்டர் மூலம் பாரகுவே கோல் பெற்றிருகக்க் கூடும்.

இரண்டாம் பாதியிலும் இந்த வகை ஆட்டமே தொடர்ந்து இரு கோல்கீப்பர்களும் அதிகம் சிரமமில்லாமல் இருந்தது.

அறுபதாவது நிமிடத்தில் ஸ்பெயினின் பிகே (Piquet) பனல்டி ஏரியாவுக்குள் பாரகுவேயின் கர்டோஸொவை வீழ்த்தியதால் பாரகுவேக்கு பெனல்டி. முன்னணி பெற மகத்தான வாய்ப்பு. மிகப் பெரிய அப்ஸெட்டுக்கு மிக அருகில் இருந்த கர்டோஸோ அடித்த பெனல்டியை சரியாக கணித்துப் பிடித்தார் ஸ்பெயின் கோல்கீப்பர் காஸியாஸ்.

இது நடந்த சில நொடிகளில் டேவிட் வியா பாரகுவே வீழ்த்தப்பட்டு பெனல்டியை வென்றார். Xabi Alonso-வின் பெனல்டி கிக் கோலுக்குள் செல்ல ஸ்பெயின் குதூகலித்தது. அந்தக் குதூகலம் அரை நொடிக்குள் அடக்கப்பட்டது. பந்தை அலோன்ஸொ அடிப்பதற்குள் ஸ்பெயின் வீரர் ராமோஸ் பெனல்டி ஏரியாவுக்குள் வந்துவிட்டதால், முதலில் அடித்தது ரத்தாகி மீண்டுமொரு முறை அடிக்க வேண்டியதாகிவிட்டது. சென்ற முறை அடித்த இடத்திலேயே இரண்டாம் முறையும் அடித்தார் அலோன்ஸோ. இம்முறை உஷாராக இருந்த பாரகுவே கோல்கீப்பர், பந்தை தடுத்தாலும் பிடிக்க முடியவில்லை. ரீபவுண்டில் அடிக்க வந்த வியாவை கோல்கீப்பர் வீழ்த்தினாலும் ரேஃப்ரீ கண்ணில் படாததால் ஸ்கோர் 0-0 என்றே தொடர்ந்தது.

ரீப்ளேயில் பார்த்த போது பாரகுவே அடித்த பெனல்டியின் போதும் அடிப்பதற்கு முன் வீரர்கள் பெனல்டி ஏரியாவுக்குள் நிழைந்திருப்பது தெரிய வந்தது. ரெஃப்ரீயின் கவனத்தைப் பெறாததால், ஸ்பெயின் பிழைத்துக் கொண்டது. இரு அணிகளும் இழந்த வாய்ப்பை எண்ணி வருந்திய போதும், எதிரணி முன்னிலை பெறாததை எண்ணி அமைதியுற்றிருக்கும்.

இந்தக் குழப்பங்கள் முடிந்த சில நிமிடங்களுக்குள் இனியஸ்டாவின் அற்புதமான முயற்சியை கோல் போஸ்ட் தடுத்தது. போஸ்டில் பட்டு திரும்பி வந்த பந்தின் திக்கில் வியா இருந்ததால், இன்னொரு கோல் முயற்சி. இம்முறையும் பந்து போஸ்டில் பட்டாலும், பந்து கோலுக்குள் சென்றது.

ஏழு நிமிடங்களே பாக்கி இருந்த நிலையில் பாரகுவேயால் தக்க பதிலடி கொடுக்க முடியவில்லை.

ரொம்பவே காலம் தாழ்த்தி சாண்ட கிரஸ் போன்ற முன்கள வீரர்களை களமிறக்கியதற்கு பாரகுவே அதிகம் வருந்தியிருக்கும்.

கடைசி நிமிடத்தில் சாண்ட கிரஸும் பாரியோஸும் செய்த முயற்சிகளை காஸியாஸ் லாவகமாய் தடுத்து, தன் அணி அரை இறுதிக்குள் முதன் முறையாகச் செல்வதை உறுதி செய்தார்.

அரையிறுதியில் ஸ்பெயின் ஜெர்மனியுடன் மோத, உருகுவே நெதர்லாந்திடம் மோதுகிறது.

1,3,4 ஆட்டங்களைப் பற்றி எழுதி, இரண்டாம் ஆட்டத்தைப் பற்றி எழுதாமல் இருப்பதை எண்ணி சிலர் வியக்கக் கூடும்.

ஆட்டத்தைப் பார்க்காத போதும், பார்த்தது போலவே எழுதும் அளவிற்கு ஓர் எழுத்தாளனாக நான் இன்னும் வளரவில்லை என்பதுதான் அதற்குக் காரணம்.

நன்றி: இட்லிவடை

Advertisements

முதல் சுற்றைக் கடந்து நாக் அவுட் ரவுண்டுக்கு 16 அணிகள் தேர்வு பெற்றன.

அவற்றிடையே, முதல் நாளின் முதல் போட்டியாக உருகுவேயை எதிர்த்து தென் கொரியா விளையாடியது.

இரு அணிகளும் நல்ல அணிகள் என்ற போதும், முதல் சுற்றில் உருகுவேயின் ஆட்டம் அவர்களுக்கான வெற்றி வாய்ப்பே அதிகம் என்று உணர்த்தியது.

ஆட்டத்தின் தொடக்கத்தில் இருந்தே இரு அணிகளும் அதிரடியில் இறங்கின. லீ சுங் யங்கின் ஃப்ரீ கிக்கின் திக்கை உணராது கோல் கீப்பர் கல்லாய் சமைந்திருக்க, பந்து போஸ்டில் பட்டு கொரிய ரசிகர்களின் இதயத்தை உடைத்தது.

அதிர்ஷ்டத்தால் கிடைத்த சந்தோஷத்தை ஒரு கோல் மூலம் இரட்டிப்பாக்கிக் கொண்டனர் உருகுவேயினர். உருகுவேயில் முக்கிய வீரர் ஃபோர்லான் இட முனையிலிருந்து பெனல்டி பிரதேசத்துக்குள் கிராஸ் செய்தார். கொரிய கோல்கீப்பர் முனைந்திருந்தால் பந்தைத் தடுத்திருக்கக் கூடும். அப்படிச் செய்யாததால், டிஃபெண்டர்களின் கட்டுக்குள் இல்லாத சௌரெஸ் (Saurez) இடம் பந்து சென்றது. ஃபார் போஸ்டில் சுலபமாக பந்தை கோலுக்குள் செலுத்தி 1-0 ஆக்கினார்.

மான்சஸ்டர் யுனைடடில் விளையாடும் பார்க் ஜி சுங் உருகுவேயின் கோட்டையைத் தகர்க்க பல நல்ல முயற்சிகளைச் செய்தார். அவை அவருக்கு நிறைய ரசிகர்களைக் கொடுத்திருக்குமெனினும் கோல் எதுவும் கொடுக்கவில்லை. இவரை மார்க் செய்த உருகுவேயின் லுகானோவின் (Lugano) ஆட்டம் வெகு சிறப்பாக அமைந்து, பல்வேறு முயற்சிகளை மழுங்கடித்தது.

இரண்டாம் பாதியில் லீடை தக்க வைத்தால் போடும் என்ற மனநிலையில் உருகுவே விளையாடத் தொடங்கியது. தென் கொரியாவும் தொடர்ந்து கோலருகில் நெருக்கடிகளை உருவாக்கிய வண்ணமிருந்தது. அதன் பலனாய் 68-வது நிம்டத்தில் ஸ்கோரை சமன் செய்தது.

அதுவரை சிறப்பாக ஆடி வந்த லுகானோ, கோல்கீப்பருக்கு உதவியாய் பந்தை கிளியர் செய்வதாக எண்ணி லீ சுங் யங்கிடம் தாரை வார்த்தார். கிடைத்த வாய்ப்பை முழுதும் பயன்படுத்தி 1-1 ஆக்கினார் சுங் யங்.

அதன் பின் அழுத்தமெல்லாம் உருகுவேக்குத்தான். பார்க் ஜீ சங்கின் துல்லியமான பாஸ் லீ சுங் யங்கின் இரண்டாவது கோலுக்கு வழி வகுக்கும் விதமாய் அமைந்தது. கோலுக்கும் அவருக்கும் இடையில் கோல்கீப்பர் மட்டுமே இருந்த நிலையில் பந்தை நேராக கீப்பர் முஸ்லேராவிடம் அடித்து பொன்னான வாய்ப்பை நழுவவிட்டார். It proved costly.

சற்றைக்கெல்லாம் சௌரெஸ் இன்னொரு கோலை அடித்து உருகுவேயின் வெற்றியை உறுதி செய்தார். ஃபோர்லானின் கார்னரை பராக்கு பார்த்தபடி கொரியா இருக்க, பெனால்டி பெட்டியின் முனையில் பந்தைப் பெற்று அதைத் தன் வலது காலுக்கு மாற்றி, edge of the box-ல் இருந்து சௌரெஸ் அடித்த பந்து காற்றிலே வளைந்த படி கோலுக்குள் நுழைந்தது. One of the best goals of the tournament.

கடைசி நிமிடங்களில் கொரியாவின் வாய்ப்பை லுகானோ மறுத்ததும் கொரியா வீட்டுக்குச் செல்வது உறுதியானது. ஆசியாவில் இருந்து முன்னேறிய இரு அணிகளுள் ஒரு அணி வெளியேற்றப்பட்டுவிட்டது.

ஆனால், ஆஃப்ரிக்காவில் இருந்து இரண்டாம் சுற்றை அடைந்த ஒரே அணி பிழைத்துக் கொண்டது.

இரண்டாவது ஆட்டத்தில் அமெரிக்காவுடன் கானா மோதியது.

டிடியர் ட்ரோபா, சாமுவெல் ஈடோ போன்ற நட்சத்திர வீரர்கள் யாரும் இல்லாத ஆஃப்ரிக்க அணி என்ற போதும் செர்பியாவுடனும் ஆஸ்திரேலியாவுடனுமான ஆட்டங்களில் கானாவின் கை ஓங்கியிருந்தது. பல முறை உலக சாம்பியன் ஆன ஜெர்மனியின் கண்ணில் கூட விரலை விட்டு ஆட்டியது கானா. (விவரங்களை இங்குகாணலாம்.)

அமெரிக்காவும் முதல் ரவுண்டில் நன்றாகவே விளையாடியது. டோனொவன் என்ற சிறந்த ஆட்டக்காரரை ஃபுட்பால் உலகுக்கு இந்த போட்டி மூலம் ஈந்திருக்கிறது அமெரிக்கா. அவர் அடித்த இஞ்சரி டைம் கோல் அமெரிக்காவை அடுத்த சுற்றுக்குள் அழைத்து வந்திருந்தது.

கானாவின் முதல் சுற்று கோல்கள் இரண்டும் பெனல்டியில் கிடைத்தவையே. ஆயூ, கியான் போன்ற கானா வீரர்கள் நன்றாக விளையாடிய போதும் ஃபினிஷிங் அவர்களின் குறையாகவே இருந்தது. இந்த ஆட்டத்தில், ஆட்டம் தொடங்கிய சில நிமிடங்களில் போடெங் (Boateng) கோலடித்து கானாவின் முதல் ஃபீல்ட் கோலைப் பெற்றுத் தந்தார்.  அரைக்கோட்டுக்கு பக்கத்திலிருந்த அமெரிக்க வீரரிடமிருந்து பந்தைக் கவர்ந்து, மின்னல் வேகத்தில் ஒற்றை ஆளாய் கோல் நோக்கி விரைந்தார் போடெங். தற்காப்பாளரின் தடுப்புகளுக்கு அசராமல், deft left-footer மூலம் கோல் அடித்து 1-0 ஆக்கினார். இவர் ஜெர்மனியில் பிறந்து வளர்ந்தவர். சில மாதங்களுக்கு முன்தான் தனது nationality-ஐ தன் தந்தை பிறந்த நாடான கானாவுக்கு மாற்றிக் கொண்டவர். இவரது சகோதரர் ஜெர்மன் அணியில் இடம் பெற்றுள்ளார். கானாவின் முந்தைய ஆட்டத்தில் இரு சகோதரர்களும் வெவ்வேறு அணிகளுக்காய் களமிறங்கினர்.

அமெரிக்காவும் தொடர்ந்து பல தாக்குதல்களைத் தொடுத்தது. கானா கோல்கீப்பர் கிங்சனின் அபாரமான காப்புகள் ஸ்கோர் 1-0-வென்றே தொடர காரணமாய் இருந்தன. குறிக்காக Dempsey-ம், Findley-ம் இணைந்து தொடுத்த தாக்குதலை கிங்ஸன் காலால் தடுத்தது just brilliant.

இரண்டாவது பாதியில் களமிறங்கிய Benny Feilhaber உடனேயே கோல் அடிப்பதற்கு வெகு அருகில் சென்றார். கிங்ஸனின் aggressive save-தான் மீண்டும் கானாவை காப்பாற்றியது.

62-வது நிமிடத்தில், பெனால்டி பாக்ஸுக்குள் Dempsey-ன் பிரவேசம் கானாவுக்கு ஆபத்தைக் கட்டியம் கூற, தடுக்க முயன்ற கானா வீர மென்ஸா, டெம்ப்ஸெயை வீழ்த்தியதால் அமெரிக்காவுக்கு பெனால்டி. டோனொவன் தன் திறமையையும் அனுபவத்தையும் முழுமையாய் உபயோகித்து, மீண்டுமொருமுறை அமெரிக்காவுக்கு கோல் அடித்து 1-1 ஆக்கினார்.

அதன் பின், அமெரிக்காவுக்கு சில வாய்ப்புகள் கிடைத்த போதும், கானாவின் துல்லியமான டிஃபென்ஸ் ஆட்டத்தை extra time-க்குள் கொண்டு போனது.

ஆட்டத்தின் தொடக்கத்திலேயே கோல் அடித்தது போலவே எக்ஸ்டிரா டைமின் முதல் சில நிமிடங்களிலேயே கோல் அடித்து 2-1 ஆக்கியது கானா. அயூவின் லாங் பால், கானாவுக்கு நிறைய கோல்கள் அடித்துள்ள கியானை அடைய, இரு டிஃபெண்டர்களை மீறி கச்சிதமாய் கோல் கீப்பரைக் கடந்து பந்தைச் செலுத்தி 2-1 ஆக்கினார்.

மரண அடி. அமெரிக்காவால் மீள முடியவில்லை.

ஆட்டம் நடக்கும் நாடு அடுத்த சுற்றுக்கு தகுதி பெற முடியவில்லை எனினும், ஆட்டம் நடக்கும் கண்டத்திலிருந்து ஒரு நாடு கால்-இறுதிக்கு தகுதி பெற்ற போது அரங்கம் ஆர்ப்பரித்தது.

நாக் அவுட் ரவுண்டின் இரண்டாவது நாளின் முதல் போட்டியை உலகமே எதிர்பார்த்துக் கொண்டிருந்தது.

ஞாயிற்றுக் கிழமை அன்று சௌகரியமான வேளையில் இரு பெரும் அணிகள் மோதுவதைப் பார்ப்பது என்பது சாமானியமாய் நடப்பதா என்ன?

ஜெர்மனியும் இங்கிலாந்தும் நேற்று மோதின.

இங்கிலாந்தின் வீரர்கள் மிகப் பிரபலமானவர்கள். இந்தியாவுக்கு கிரிக்கெட்டைப் போல இங்கிலாந்துக்கு கால்பந்து. இங்கிலாந்து ஆடும் நாட்களில் நாடே ஸ்தம்பித்து விடும் அளவுக்கு கால்பந்து பிரியர்கள். ஒவ்வொரு முறையும், பிரிட்டிஷ் மீடியா இவர்களை ஏற்று விட்டு, தோற்கும் போதெல்லாம் பின்னிப் பெடலெடுக்கும்.

இம்முறை இரண்டாவது ரவுண்டுக்கே தகுதி பெறுமா பெறாதா என்று கேள்வியை எழுப்பி, ஒரு வழியாய் முதல் சுற்றைக் கடந்து இரண்டாம் சுற்றுக்குள் நுழைந்தது இங்கிலாந்து. ரூனி, லாம்பார்ட், ஜோ கோல், போன்றோர் எல்லாம் அவரவர் கிளப்புக்கு ஆடுவதில் 10-ல் ஒரு பங்கைக் கூட நாட்டுக்காக விளையாடும் போது ஆடுவதில்லை என்பது திண்ணம்.

ஜெர்மனியும் செர்பியாவுடன் தோற்று ஜெர்மன் ரசிகர்கள் வயிற்றில் புளியைக் கரைத்தாலும், கானாவுடன் சிறப்பாக விளையாடியது. Ozil, Muller, Podolski போன்ற பல இளைஞர்களைக் கொண்ட அணி ஜெர்மனி. ஃபிலிப் லாம், ஷ்வைன்ஸ்டைகர், க்ளோசா போன்ற அனுபவசாலிகளும் அணிக்கு வலு சேர்க்கின்றனர்.

ஆட்டத்தில் ஜெர்மனி ஜெயிக்க வாய்ப்பு கூட எனினும், ஆட்டம் சுவாரஸ்யமான ஒன்றாய் இருக்கும் என்ற எதிர்பார்ப்பு இருந்தது. ஸ்லோவீனியாவுடனான ஆட்டத்தில் இங்கிலாந்தின் ஆட்டம் சிறப்பாக அமைந்ததும் எதிர்பார்ப்பைக் கூட்டியது.

ஆட்டத்தின் முதல் இருபது நிமிடங்களில் பந்து இங்கிலாந்திடமே இருந்த போதும் கோல் அடிப்பதற்கான அறிகுறியே தென்படவில்லை. இத்தனைக்கும் இங்கிலாந்தின் மிட் ஃபீல் முழுவதும் அதிரடியில் இறங்கியிருந்தது. தற்காக்க வேண்டிய டெர்ரி போன்றோர் கூட கோல் அடிப்பதில் முனைப்பாக இருந்தனர். 20-வது நிமிடத்தில் ஜெர்மனியின் கோல் கிக் கிட்டத்டஹ்ட்ட ஜெர்மன் ‘டி’ வரை வந்துவிட, இங்கிலாந்தின் காப்பாளர்களான டெர்ரியும், அப்ஸனும் உருவாகும் அபாயத்தை உணராமலிருந்ததைப் பயன்படுத்தி க்ளோஸா பந்தை எப்படியொ கவர்ந்து, அப்சனின் கடைசி நிமிட ஊடுருவலை சமாளித்த படியே பந்தை கோல்கீப்பர் ஜேம்ஸைத் தாண்டி அடிக்க ஸ்கோர் 1-0 ஆனது.

அதன் பின்னும், இங்கிலாந்து தற்காப்பை அலட்சியமாகவே செய்தது. விரைவிலேயே இன்னொரு முயற்சியில் தாமஸ் முல்லர் கோல் வரை வந்து, தனியாக இருந்த பொடோல்ஸ்கியிடம் பந்தைக் கொடுக்க ஸ்கோர் 2-0. இத்தனைக்கும் பொடோல்ஸ்கியின் first touch கச்சிதமாய் அமையவில்லை. அதைச் சமாளித்து கோல் அடிக்கும் வரை கூட அவரை எந்த இங்கிலாந்து வீரரும் நெருங்கவில்லை. முதல் கோலுக்கும் இரண்டாவது கோலுக்கும் இடையே இன்னொரு வாய்ப்பு கிளோசாவுக்கு வாய்த்தது. நல்ல காலம் ஜேம்ஸிடம் பந்து நேராக சென்றதால் ஸ்கோர் 3-0 ஆகாமல் தப்பித்தது.

இங்கிலாந்தைப் பார்த்து ஆட்டத்தை ஜெர்மனி மாற்றிக் கொண்டதோ என்று எண்ணும் வகையில் இங்கிலாந்தின் முதல் கோல் அமைந்தது. லாம்பார்டின் ஷார்ட் கார்னர், ஜுராட்டுக்கு வர, அவர் அதை கிராஸ் செய்ய, ஜெர்மன் வீரர்கள் வேடிக்கை பார்த்துக் கொண்டிருக்கையில் அப்டன் தலையால் கோலாக்கி ஸ்கோரை 2-1 ஆக்கினார்.

இங்கிலாந்துக்கும் ஜெர்மனிக்கும் இடையில் நடக்கும் ஆட்டங்கள் எல்லாம் எதேனும் சர்ச்சையைக் கிளப்பும். இந்த ஆட்டத்தின் சர்ச்சை முதல் கோல் அடித்த 60 வினாடிகளுக்குள் எழுந்தது.

லாம்பார்டின் ஃப்ரீ கிக், ஜெர்மன் சுவற்றைக் கடந்து, கோல்கீப்பரையும் கடந்து, கோலுக்குள் செல்வதற்கு பதிலாய், போஸ்டில் பட்டு கீழ் நோக்கி விழுந்தது. விழுந்த பந்து கோல் கோட்டுக்குள் விழுந்த போதும் கோல் மறுக்கப்பட்டது. இந்த உலகக் கோப்பையில் பல சொதப்பல்களை ரெஃப்ரீகளும் லைன்ஸ்மென்களும் செய்துள்ளனர். ஒவ்வொரு ஆட்டம் முடிந்த பின்னும், ஏதெனும்ம் காரணத்துக்காக தொழில்நுட்பத்தை ஆட்டத்தில் புகுத்தி தவறுகளைக் குறைக்க வெண்டும் என்று வல்லுனர்கள் கருத்து தெரிவித்துக் கொண்டே இருக்கின்றனர். இங்கிலாந்து 2-2 என்று ஸ்கோரை ஆக்கியிருந்தால் ஆட்டமே மாறியிருக்கக் கூடும்.

முதல் பாதியின் முடிவில் ஸ்கோர் 2-1 என்று இருந்தது. இங்கிலாந்து சொதப்பினாலும், அரையின் முடிவில் முன்னேற்றத்துக்கான் அறிகுறிகள் தெரிகின்றன என்று ரசிகர்கள் நினைத்திருக்கக் கூடும். இரண்டாம் பாதியின் இன்னும் சிறப்பாக ஆடுவார்கள் என்ற நினைப்பு வீணாய் போனது.

தொடக்கத்தில் ஜெராட்டும் லாம்பார்டும் நன்றாக விளையாடினாலும் கொல் அடிக்க முடியவில்லை.

கழுதை தேய்ந்து கட்டெறும்பான கதையாய், இருந்த சொற்ப டிஃபென்ஸும் இல்லாமல் போனது.

கோல் அடிக்கிறேன் பெர்வழி என்று தங்கள் அரையில் ஒருவருமே இல்லாமல் எக்ஸ்போஸ் செய்தரனர் இங்கிலிஷ் வீரர்கள். இதனைப் பயன்படுத்தி இரு counter attack (இதை அப்படியே முதலில் டைப் அடித்தேன். ஜாதி கலவரம் வந்துவிடுமோ என்று பயந்து ஆங்கிலத்துக்கு மாற்றினேன்) மூலம் ஸ்கோரை 4-1 ஆக்கியது ஜெர்மனி. இரு கோகளையும் தாமஸ் முல்லர் துல்லியமாய் அடித்தார்.

ஜெர்மனியின் நான்காவது கோலின் போது பந்தைக் கவர்ந்து ஓடிய Ozil-ஐ சிறிது துரத்துவது போலத் துரத்திவிட்டு நின்று விட்ட டிஃபெண்டர்களைப் பார்க்க அதிர்ச்சியாய் இருந்தது.

அதன் பின் ஆட்டம் சடங்குக்குத்தான் நடை பெற்றது. இங்கிலாந்து தோல்விக்கு காரணம் கூற ரெஃப்ரீயின் பிழை கிடைத்துவிட்டது. நேற்றிரவே naukri.com-ல் இங்கிலாந்து கோச் கபெல்லோவின் ரெஸ்யுமே காணக் கிடைத்தாக நம்பத் தகுந்த வட்டாரங்களில் வந்து செய்திகள் தெரிவிக்கின்றன.

நான்காவது ஆட்டத்தில் tournament favorite அர்ஜெண்டினாவை மெக்ஸிகோ எதிர்கொண்டது.

எதிர்பார்த்தது போலவே அர்ஜெண்டினாவுக்கு சுலபமான வெற்றி.

மெஸ்ஸி இந்த ஆட்டத்திலும் மிகச் சிறப்பாக விளையாடியும் கோல் அடிக்கவில்லை. இவரையே எதிரணிகள் சூழ்ந்து கொள்வதால் Tevez, Higuen போன்றோர் சுலபமாக விளையாட முடிகிறது. யாரடித்தாலும் கோல்தானே? அதனால் அர்ஜெண்டினாவும் சுலபமாக வென்று வருகிறது.

இந்த ஆட்டத்தின் முதல் கோலை டெவேஸ் அடித்தார். சர்வ நிச்சயமாய் off-side position-ல் இருந்து கோலை அடித்தார் என்ற போதும் லைன்ஸ்மென் அதைக் கண்டு கொள்ளாததால் 1-0 ஆனது.

மெக்சிகோ டிஃபெண்டர் என்ன நினைத்தார் என்று தெரியவில்லை. கோலருகில் இருந்து கொண்டு பந்தை அர்ஜெண்டினா striker Higuen இடம் அளித்து அனுப்பி வைத்தார். ஏற்கெனவே 3 கோல் அடித்து கோல்டன் பூட்டுக்கு போட்டியிடும் ஹிகிவேனா விடுவார் வாய்ப்பை? ஸ்கோர் 2-0.

ஹிகுவேனின் ஹெட்டர் நிதானமாக ஆடப்பட்டிருப்பின் முதல் அரையிலேயே ஸ்கோர் 3-0 ஆகியிக்கும்.

இரண்டாவது பாதியின் ஆறாவது நிமிடத்தில் வெற்றியை நிச்சயமாக்கினார் டெவேஸ். கோலின் top right corner டெவேஸ் அடித்த கோல் will definitely be one of the goals of the tournament.

அர்ஜெண்டினா சுலபமாக வென்றாலும் அவர்களுடைய தற்காப்பும் கொஞ்சம் shaky-ஆகவே தென் படுகிறது. Favorite tag வேறு அவர்களுக்கு நெருக்கடியை உண்டாக்கக் கூடும். ஜெர்மனிக்கு எதிரான காலிறுதிப் போட்டியில் டிஃபென்ஸ் இன்னும் இறுக்கமாக இருக்க வேண்டும். அசிரத்தை ஆபத்தாய் முடியும் என்பதற்கு உதாரணமாய் மெக்சிகோவின் consolation goal அமைந்தது. சில வாய்ப்புகளை தவற விட்ட ஹெர்னாண்டெஸ் கச்சிதமாய் கோலடித்து 3-1 ஆக்கினார்.

இப்படியாக வார இறுதியின் இரு நாட்களும் இனிதே டிவியின் முன் கழிந்தன.

கிரீஸ் 2004-ல் விளையாடியது போல விளையாடும் என்று எதிர்பார்த்தேன். ஆனால், அவர்கள் தென் கொரியாவிடம் ஆடிய விதத்தைப் பார்த்தால், அனேகமாய் சீக்கிரமே வீட்டுக்குச் சென்றுவிடுவார்கள் என்று தோன்றுகிறது.

2002-ஐப் போலவே இந்த ஆண்டும் தென் கொரியா பட்டையைக் கிளப்புகிறது.

பெரிய அணிகள் வரிசையில் ஃபிரான்ஸ், இத்தாலி, ஸ்பெய்ன் மூன்றுமே மகா மட்டமாய் விளையாடின. முதல் இரு அணிகளிடம் இது எதிர்பார்க்கப்பட்டதுதான் என்றாலும் ஸ்பெய்ன் கோல் அடிக்காமல் அதிர்ச்சித் தோல்வியுற்றது எதிர்பாராதது. Under Achieving Championship-ல் ஸ்பெயினுக்கு முதல் இடம் கிடைக்கும்.

கிரிஸ்டியானோ ரொனால்டோ, டெக்கோ போன்ற சிறந்த ஆட்டக்காரர்களைக் கொண்டிருந்த போதும், ஐவரி கோஸ்ட் அணியே போர்ச்சுகலை விட சிறப்பாக விளையாடியது. டிரோபா பட்டையைக் கிளப்புவார் என்று பார்த்தால், கையில் பட்டையைக் கட்டிக் கொண்டு விளையாடி சர்ச்சையைக் கிளப்பியுள்ளார்.

பராகுவேயும் உருகுவேயும் சிறப்பாக ஆடுகின்றன. ஏதேனும் பெரும் தலைகளை இவர்கள் வீட்டுக்கு அனுப்பக் கூடும்.

பிரேசில் ஜெயித்தாலும் Samba flair missing. ”என்ன இப்படிப் பண்ணிட்டீக” என்று பிரேசில் கோச் டுங்காவைக் கேட்கத் தோன்றுகிறது.

கோச் என்றதும் மரடோனா நியாபகத்துக்கு வருகிறார். மைதானத்தின் மையப்புள்ளியாய் மெஸ்ஸி ஆடினாலும், ரசிகர்களின் கவனம் எல்லாம் மரடோனாவின் ஒவ்வொரு அசைவுக்கும் இசைந்த வண்ணம் இருக்கின்றது.

ஒரு வழியாய் எந்த noise filter-ஐ உபயோகித்தால் voice கேட்கும் என்று டிவிக்காரர்கள் கண்டுபிடித்துவிட்டார்கள்.

ஜெர்மனி நாலு கோல் போட்டாலும் ஜெயிக்குமா என்று தெரியவில்லை. ஜெர்மனியின் defense கொஞ்சமாவது test செய்யப்பட்டால் அவர்கள் உண்மை நிலை தெரிய வரலாம்.

இங்கிலாந்தின் பிரச்னை கோல்கிப்பர் Green. அது ever-green problem-ஆக மாறாமல் இருந்தால் சரி.

இன்று குரூப் பி-யின் சிறந்த அணிகள் மோதுகின்றன. 86-ல் அதிரடி ஆட்டத்தால் காயத்திலிருந்து மீண்டு வந்த மரடோனாவை கலங்க வைத்த அணி தென் கொரியா. “அவர்கள் ஃபுட்பால் ஆடவில்லை டேக்-வாண்டோ விளையாடினர்”, என்றார் மரடோனா.

ஆபீஸில் அரை நாள் ஸிக் லீவ் சொல்லியாயிற்று. Hope it is worth it.