இரண்டு இரண்டாம் செர்வுகள்

நேற்றும் இன்றும் நல்ல ஆட்டங்கள் சிலவற்றை காண முடிந்தது. இதை நான் பதிக்கும் நேரத்தில் அநேகமாக ஃபெடரருக்கு சங்கு ஊதப்பட்டிருக்கும்.

இன்று காலை பார்த்த இரண்டு செகண்ட் சர்வுகள் மனதில் தங்கின. அந்த இரண்டுக்கு முன்னால் வேறு இரண்டு மஹானுபாவர்களைப் பற்றி இரண்டு வரிகள். ஆஸ்திரேலியன் ஓபன் தொடங்கும் முன்னரே எழுத ஒப்புக் கொண்டு என் சோம்பேறித்தனத்துக்கு தீனி போட்ட இருவரையும் தீவிரமாய் தேடிக் கொண்டிருக்கிறேன். துப்பு கொடுத்தால் இதற்கு மேலும் என் மொக்கை தொடராமல் இருக்கக் கூடும் (உத்தரவாதம் இல்லை).

லியாண்டரும் பூபதியும் சேர்ந்து அள்ளாத ஒரே கிராண்ட் ஸ்லாம் ஆஸி ஓபன்தான். இருவரும் தேர்ந்த கைகள் என்ற போதும் பழைய வேகம் அப்படியே. பூபதியின் சர்வீஸ் மின்னல் என்றால் லியாண்டரின் நெட்-பிளே சூராவளி.

பல வருடங்களுக்குப் பின் சேர்ந்து ஆடும் முதல் கிராண்ட் ஸ்லாம் என்ற போதும் விட்ட குறை தொட்ட குறை. நேற்றும் சரி இன்றும் சரி, நம்மவர்கள் கை ஓங்கியே இருந்தது. இன்று காலை இரண்டாம் சீட் ஜோடியை எதிர்த்து ஆடிய போது, ஆட்டம் பரபரப்பாக இருந்தாலும், நம்மவர்கள் ஆட்டத்தில் reassurance தெரிந்தது. முதல் செட்-ல் வெல்லும் தருவாயில் டபிள் ஃபால்டை போட்டு டை-பிரேக்குக்குச் சென்றாலும், கடைசி நேரத்தில் எதிராளியை விட கொஞ்ஞ்ஞ்ஞ்சமே கொஞ்சம் சிறப்பாக ஆடி வெற்றி பெற்றனர். எப்போது நிச்சயம் தெவையோ அப்போது அவர்களின் ஆட்டத்தின் தரம் தானக உயர்ந்துவிடுவதைக் காண முடிந்தது.

காலை வேளை ஆபீஸ் கிளம்பும் களேபரத்தில் 2-ம் செட்டை நான் பார்க்காததால், லியாண்டர் – பூபதி ஜோடி மூன்றாம் செட்டுக்குள் செலுத்தப்பட்டிருந்தனர். சர்வீஸ் பிரேக்குக்குப் பின், பூபதி மேட்சை ஜெயிக்க சர்வ் செய்த போது நெச்டரும், மிர்ன்யியும் பிரமாதமாக ஆடி முன்னிலை பெற்றனர். கொஞ்ச நேரத்துக்கெல்லாம் பிரேக் பாயிண்ட். 3-40.

முதல் செர்வ் ஃபால்டாக, இரண்டாம் செர்வ் மெதுவாக வரும் என்று நம்பி சில அடிகள் முன் வைத்தார் நெஸ்டர். பூபதியோ, யாருமே எதிர்பாரா வண்ணம் முதல் சர்வை விட வேகமாக, 191-kmph வேகத்தில் கட்டத்தின் நுனியில் சர்வை செலுத்தி, ஏஸாக்கி ஸ்கோரை சமன் செய்தார்.

முக்கியமான தருணம். கரணம் தப்பினால் மரணம். விழுந்தது மரண அடி. எதிரிக்கு. அதன் பின் சுலபமாக வென்று இறுதியாட்டத்துக்கு தகுதி பெற்றனர்.

அடுத்த ஆட்டம் நடப்பு சாம்பியன் ப்ரையன் சகோதரர்களுடன்.

இன்னொரு ஆட்டத்தில் லி-னா தோல்வியின் நுனியில் போராடிக் கொண்டிருந்தார். எதிர் கோர்டில் உலக நம்பர் 1 வோஸ்நியாகி. நான் பார்க்க ஆரம்பித்ததிலிருந்து, லி-யின் கைதான் ஓங்கு இருந்தது. அவர் தோற்ற புள்ளிகள் பெரும்பாலும் அவர் செய்த தவறால்தான்.

5-4 முன்னணியின் இருந்த வோஸ்நியாகிக்கு மேட்ச் பாயிண்ட். ஒரே புள்ளி எடுத்திருந்தால் ஆட்டம் ஓவர். வோஸ்நியாகி போட்ட சர்வீஸில் டென்ஷன் அப்பட்டம். லி சாதுர்யமாக ஆடி ஆட்டத்தை நீட்டித்தார். அதன் பின் 6-5 என்று முன்னிலை பெற்றிருந்த நிலையில் மீண்டும் வொஸ்நியாகியின் சர்வீஸ் அவரை கைவிட்டது.

ஜெயித்தே ஆக வேண்டும் என்ற புள்ளியிக் இரண்டாவது சர்வ். அதுவும் ஃபால்டாகிப் போய்விட, இனி சீன வீராங்கனையின் வெற்றியை யாரும் தடுக்க முடியாது என்பது திண்ணமானது.

கிராண்ட் ஸ்லாம் ஃபனலில் இடம் பெறும் முதல் சீன வீராங்கனை இவர்தான்.

ஆசியாவின் ஸ்டார் என்பது போல மாயையை உருவாக்கி விளம்பர நடிகையாய் வலம் வீராங்கனைகளுக்கிடையில் உண்மையன ஸ்டார் லீ-நாதான். நாளை மறுநாள் இவர் பட்டம் வென்றால் நான் கொஞ்சம் கூட ஆச்சர்யப்பட மாட்டேன்.

 

அபூர்வ ராகங்கள்

இங்கு இணையத்தில் இந்தப் பதிவுகளைப் படிப்பவர்கள் யாரும் இன்றோ நேற்றோ நடந்த டென்னிஸ் போட்டியில் யார் வென்றார்கள் என்பதை அறிந்து கொள்ள இங்கு வரவில்லை என்பதை நினைவில் வைத்துக் கொண்டுதான் நான் இங்கு பதிவுகளை எழுதுகிறேன். ஒரு குறிப்பிட்ட டென்னிஸ் ஆட்டத்தில் என்ன நடந்தது என்பது குறித்த விவரிப்பைவிட, அந்த ஆட்டத்தைப் பார்த்தபின் என்ன சொல்லத் தோன்றுகிறது என்பதையே எழுத நினைக்கிறேன்.

எதற்கு இப்படி முழ நீளத்துக்குப் பீடிகை போடுகிறேன் என்றால், இப்போது நான் நேற்று மாலை பார்த்த ஒரு ஆட்டத்தைக் குறித்து அப்போது எடுத்து வைத்த குறிப்புகளைக் கொண்டு இந்தப் பதிவை எழுதப் போகிறேன்.

அந்த ஆட்டம் ஹெவிட்டும் நால்பண்டியனும் ஆடிய அற்புதமான ஆட்டம்- ஆட்ட முடிவில் நால்பண்டியன் 3-6 6-4 3-6 7-6 (7-1) 9-7 என்று வென்றார். பதினைந்து ஆண்டுகளாகத் தொடர்ந்து ஆஸ்திரேலியன் ஓப்பனில் ஆடுகிற ஹெவிட்டுக்கு இது மிகுந்த துக்கத்தைத் தந்திருக்கக் கூடிய தோல்வி. அவர் ஜெயித்திருக்க வேண்டிய ஆட்டம் இது.

டென்னிஸ் விளையாட்டு தொலைக்காட்சியில் பார்க்கும்போது எளிதாக இருக்கிறது. பெடரர் அடிக்கிற வாலிக்கும் தோனி அடிக்கிற ஸ்ட்ரைட் ட்ரைவுக்கும் அப்படி ஒன்றும் பெரிய வேறுபாடு தெரிவதில்லை. உடலின் இயக்கம், பாலன்ஸ் என்று பார்த்தால் எல்லாம் ஏறத்தாழ ஒன்றுதான்.

ஆனால் டென்னிஸ் களத்தின் அகலம் சரியாக எழுபத்து எட்டு அடிகள். கிரான்ட் ஸ்லாம் போட்டிகளில் ஆடும் வீரர்கள் போடும் சர்வீஸ் சர்வ சாதாரணமாக மணிக்கு இருநூறு கிலோ மீட்டர் வேகத்தில் பட்டுத் தெறிக்கிறது. இந்தப் எரிபந்துகள் எழுபத்து எட்டு அடி தாண்டி உங்கள் மட்டைக்கு வரும் நேரத்தில் உங்களுக்கு அதைத் திருப்பி அடிக்கக் கிடைக்கும் அவகாசம் இரு முறை கண் சிமிட்டும் காலப் பொழுதே! சர்வீஸ் வேகத்தை விட ராலிகளில் பந்து பறக்கும் வேகம் சற்றே குறைவு- மணிக்கு எண்பதில் இருந்து நூற்று எண்பது கிலோ மீட்டர் வேகம்- இந்தப் பந்துகளைத் திருப்பி அடிக்க உங்களுக்கு இருக்கும் நேரம் ஒன்று முதல் மூன்றரை நொடி அளவே.

வரும் பந்தை டவுன் தி லைனில் அடிக்கலாமா, கிராஸ் கோர்டில் திருப்பலாமா என்று முடிவெடுக்க காலேஅரைக்கால் வினாடிதான் அவகாசம். கல்பனை ஸ்வரத்தில் இதுக்குப் பின் இதுதான் வரும் என்று ஊகித்து வயலின்காரர் வாசிப்பார். அப்படி வாசிக்கச் செய்வது அவர் உள்ளுணர்வு. 99% அது சரியாகவே அமையும். டென்னிஸில் இந்த Anticipation-தான் தேர்ந்த வீரருக்கும் சுமாரான வீரருக்கும் வித்தியாசத்தைக் காட்டும்.

டென்னிஸ் விளையாடுவது எவ்வளவு கடினம் என்பது குறித்து ஓரளவு கவனம் ஏற்படுத்த முயற்சித்திருக்கிறேன். வேகத்தைவிட இன்னும் முக்கியமான விஷயங்கள் நிறைய இருக்கின்றன என்பதை சொல்லத் தேவை இல்லை.

“You have no idea of speed when you watch a game on Television”, என்று ஹர்ஷா போக்ளே அடிக்கடிச் சொல்வார்.

நேற்று நடந்த ஆட்டத்தில் நான்காவது செட்டில் முதல் இரண்டு கேம்களிலும் ஹெவிட்டின் கை ஓங்கி இருந்தது. இரண்டாவது கேமில் நால்பண்டியன் பிரேக் ஆனார். ரொம்பவே தடுமாறினாலும் ஆறாவது கேமில் நால்பண்டியன் ஹெவிட்டை ப்ரேக் செய்தார். ஐந்தாவது கேமில் நால்பண்டியன் அடித்த இரண்டு பந்துகள் எல்லைக் கோட்டைத் தாண்டி ஓரிரு அங்குலங்கள் தாண்டி வெளியே விழுந்தன. இவற்றை மறுபரிசீலனை செய்யக் கோரியிருந்தார் நால்பண்டியன். இரண்டும் ஹெவிட்டுக்கே சாதகமாக இருந்தன. ஆனாலும் மனம் தளராமல் அடுத்த கேமில் ஹெவிட்டை அவர் ப்ரேக் செய்தார். அதன் பின் அசாத்திய ஷாட்கள் சிலவற்றை ஆடிய நால்பண்டியன் எட்டாவது கேமில் ஹெவிட்டை மறுபடியும் ப்ரேக் செய்தார். அதற்கு அடுத்த ஆட்டத்தில் ஹெவிட் நல்பண்டியனை ப்ரேக் செய்து டை பிரேக்கர் வரை காலத்தைத் தன் கையில் வைத்திருந்தார். டை பிரேக்கரில் நல்பண்டியன் ஏழு ஒன்று என்று ஜெயித்தார்.

ஹெவிட்டின் தோல்விக்கு ஒரே ஒரு காரணம்தான் – அவருக்கு நல்பண்டியனை பிரேக் செய்ய முப்பது வாய்ப்புகள் கிடைத்தன- அவற்றில் ஏழே எழு முறைதான் அவரால் தன் வாய்ப்பைப் பயன்படுத்திக் கொள்ள முடிந்தது.

அப்படியானால் ஹெவிட்டின் கை ஆட்டம் முழுதும் ஓங்கியிருந்தது, முக்கியமான கட்டங்களில் நல்பண்டியன் தன் ஆட்டத்தை உயர்த்தி வெற்றி பெற்றார் என்றுதானே பொருள் வருகிறது? உண்மைதான். இந்த லெவலில் ஆடுகிறவர்கள் ஏறத்தாழ ஒரே அளவு திறமை படைத்தவர்கள். முக்கியமான கணங்களில் எப்படி ஆடுகிறார்கள், என்ற மன வலு மற்றும் உடல் இயக்கம் சார்ந்த விஷயங்களே முடிவைத் தீர்மானிக்கின்றன.

—–

அபூர்வ ராகம் என்ற கதையில், லா.ச.ரா எழுதுகிறார், “சற்றே காற்றடித்தாலும் சப்திக்கும் முறுக்கேறிய தந்தி போல் அவள் ஒரு புது கலகலப்பாய் இருந்தாள். அவள் சிரிப்பில் கண்ணாடி உடையும் சத்தம் போல் ஒரு சிறு அலறல் ஒலித்தது,” என்று.

இது போன்ற சம அளவில் திறமை படைத்த உயர்நிலை ஆட்டக்காரர்கள் ஆடுவதை லாசராவின் வரிகள் வர்ணிக்கின்றன என்றுகூட சொல்லலாம். வெற்றிக்கும் தோல்விக்கும் இடையில் உள்ள தொலைவு ஓரிரு அங்குலங்கள், வேறுபாடு பந்து ராக்கெட்டில் பட்டுத் தெறிக்கும் கணப்போழுதின் ஓரிரு டிகிரி கோண திருப்பம்- அவ்வளவுதான். இதை கத்தி முனையில் உயர்வேகத்தில் பாடும் பாடல் என்று சொல்லலாம். எவ்வளவு நளினமான ஷாட்டானாலும் சரி, அதில் ஒரு சிறு அலறல் இருக்கிறது: இருவரையும் இணைத்து இறுக்கிக் கட்டிய திறன் உச்சமடைந்து பொறி தட்டும் ஒலி அது.

நான் நினைத்துக் கொள்கிறேன்: பந்து ராக்கெட்டில் படும் சத்தம், பந்தை எட்டிப் பிடிக்க விரைந்தோடும் பாதங்களின் சத்தம், இவற்றோடு கூட பந்தின் திசைகேற்பவும் சுழற்சிக்கேற்பவும் ஒலியின் பிட்ச்சை மாற்றிக் கேட்க முடிந்தால், நாம் தொலைக்காட்சியை இருட்டடித்துவிட்டு ஒரு சிம்போனியைக் கேட்கிற மாதிரி கண்ணை மூடி டென்னிஸ் ஆட்டத்தை ரசிக்கலாம் என்று.

இதில் யார் வென்றார்கள் யார் தோற்றார்கள் என்பது தவிர்க்க முடியாத ஒரு இழப்பு போன்ற ஒன்றே- நிகழ்தகவு சாத்தியங்களால் விதிக்கப்பட்டது என்பதைத் தவிர இதில் பொருளேதும் இல்லை. யாரோ ஒருவர் ஜெயித்தாக வேண்டும்- அதற்காக யாரும் தோற்றதாக நினைப்பதற்கில்லை.

இன்றைக்குக் கூட பாருங்கள், பெடரர் கைல்ஸ் சைமனை 6-2, 6-3, 4-6, 4-6, 6-3 என்று ஜெயித்திருக்கிறார். இதில் பெடரர் ஜெயித்தார், சைமன் தோற்றார் என்பது இந்த விளையாட்டின் நியதிகளால் நிர்பந்தப்படுத்தப்பட்ட விதி. அவ்வளவுதான்.

டென்னிஸ் விளையாட்டு ஒரு இனிய சங்கீதம் மாதிரி- தொலைக்காட்சியை ஊமையாக்கி வைத்துப் பாருங்கள், புரியும். கிரிக்கெட் கண்களுக்கு விருந்து என்றால், டென்னிஸ் செவிக்கினிய கீதம். இங்கு களத்தில் நடப்பது மோதல் அல்ல, ஜுகல்பந்தி.

லாசரா அதே கதையில் வேறு இடத்தில் “அபூர்வ ராகத்தின் நிரடலான நிரவல் கட்டத்தில் ராகம் தவறில் அதைவிட அவமானம் உண்டோ?” என்று கேட்டு விட்டு பதில் சொல்வார், “ஆனாலும் பிடிப்பின் எடுப்பாய்ப் பூராவும் இருக்க முடியுமா? ராகம் தன் இயல்பு மாறாதவரை எப்படியிருந்தாலும் சுஸ்வரந்தான்,” என்று.

டென்னிஸில் இந்த ஹெவிட்- நல்பண்டியன், பெடரர் சைமன் ஆட்டங்கள் அந்த மாதிரியான அபூர்வ ராகங்கள்.

-நாட்பாஸ்

 

முதல் ரவுண்ட், முதல் ஆட்டம், முதல் பதிவு

மரியா ஷரபோவா- ஆருயிர் குடிக்கும் கூற்றம் கொல்லோ!

“மணி வாய் என்ன தனித் தோன்றி
கொலை மேற்கொண்டு ஆருயிர் குடிக்கும்
கூற்றம் கொல்லோ – கொடிப் பவளம்?”

என்று பாடினான் கவிச்சக்ரவர்த்தி கம்பன்- ஊர் பேர் தெரியாத ஒரு பெண்ணின் சிவந்த உதடுகளை நினைவுக்குக் கொண்டு வரும் பவளத்தைக் குறித்தல்ல, மரியா ஷரபோவாவுக்காகவே எழுதியது போலிருக்கின்றன இந்த வரிகள்.

அதை எதிரொலிக்கும் வகையில்தானோ என்னவோ ஐஸ்வர்யா ராயைப் பார்த்து

“உசுரே போகுதே உசுரே போகுதே ஒதட்ட
நீ கொஞ்சம் சுழிக்கையிலே..”

என்று பாடினார் கவிப் பேரரசு வைரமுத்து.

என்னடா டென்னிஸ் பற்றி எழுதுகிறேன் என்று சொல்லிக் கொண்டு ஜன்னி வந்தவன் மாதிரி உதடுகளையும் பவளத்தையும் பற்றி உளறிக் கொண்டிருக்கிறான் இவன் என்று எண்ண வேண்டாம் நண்பர்களே, இது ஷரபோவா எபெக்ட்.

உள்ளதை உள்ளபடியே சொல்வதானால் இவ்வாண்டு ஆஸ்திரேலிய ஓப்பன் முதல் சுற்றின் முதல் ஆட்டத்தின் முதல் கேமின் துவக்கத்தைப் பார்த்ததும் எனக்கு உண்மையிலேயே உசுரே போய் விடுகிற மாதிரிதான் இருந்தது- சமையல் வேலையை எல்லாம் முடித்து விட்டு அரக்கப்பரக்க சட்டையும் ஸ்கர்ட்டும் மாட்டிக் கொண்டு வந்த மாதிரி இருந்த தாய்லாந்து வீரர் தாமரைன் தானசுகம் (Tamarine Tanasugarn- (சின்னதாக தொப்பைகூட இருந்தது அவருக்கு)) ஷரபோவாவின் சர்வீசை ப்ரேக் செய்தார்- ஷரபோவா ஒரு பாயிண்ட்கூட எடுக்கவில்லை என்று நினைக்கிறேன்.

ஆரம்பமே அபசகுனமாக இருக்கிறதே என்று நான் துணுக்குற்றது உண்மைதான், சென்ற ஆண்டு முதல் சுற்றிலேயே ஷரபாவோ வெளியேற நேர்ந்தது டென்னிஸ் ரசிகர்களுக்கு ஈடு செய்ய இயலாத இழப்பாக இருந்தது என்பதை ஒப்புக் கொள்ள வேண்டும். நல்ல வேளை இந்த ஆண்டு அப்படி ஒரு அசம்பாவிதமும் நடந்துவிடாதபடிக்கு ஷரபோவா ஆயிரம் பூனைகளின் வதை அலறல்களோடு பார்முக்கு வந்தார்- அடுத்து வந்த அத்தனை கேம்களையும் எடுத்து 6-1 என்று ஜெயித்தார் அவர். இரண்டாவது செட்டை 6-3 என்று கைப்பற்றி அடுத்த சுற்றுக்குள் நுழைகிறார் மரியா ஷரபோவா.

பேசும்படி எதுவும் இல்லாத இந்த ஆட்டத்தில் ஷரபோவா பத்து டபுள் பால்ட்களும் இருபத்து இரண்டு தூண்டப்படா பிழைகள் (unforced errors-க்கு இந்தப் பதம் பொருத்தமா?) செய்ததும் நமக்குக் கவலை கொடுக்கக்கூடிய விஷயங்கள்.

எது எப்படியோ, ஒரு சிறிய ஜெர்க் கொடுத்து ஆரம்பித்திருக்கிற இந்த ஆண்டின் போட்டிகளில் நமக்கு வேண்டியவர்கள் வெற்றி பெற்றுக் கொண்டே இருக்க எல்லாம் வல்ல இறைவனைப் பிரார்த்திகிறேன்.

image credit:http://www.mobileapples.com

– நாட்பாஸ்

 

கிரிகிரிக்க வைக்கும் தொடக்கம்

கிரிக்கெட் தவிர வேறேதும் விளையாட்டுகள் பக்கம் காரண காரியங்கள் இருந்தாலேயொழிய தலைவைத்துப் படுக்காதவன் ’கிரிக்கெட் தவிர’வில் எழுத வந்துள்ளேன்.

“பிரசவ வைராக்கியம், ஸ்மசான வைராக்கியம்” என்று ஏதேனும் கிரிக்கெட் ஊழல் நேரத்திலோ அல்லது வேறு ஆட்டம் ஏதோ ஒன்றில் எங்கேனும் யாரேனும் சாய்னா போல தப்பித் தவறி இந்தியாவில் எட்டிப் பார்க்கும் வேளையிலோ “கிரிக்கெட் என்னங்க பதினொரு முட்டாள்கள் கேம், டென்னிஸ் தெரியுமா. ஒரு தனி மனுஷன் மூணரை மணிநேரம் போராடினாத்தான் ஜெயிக்க முடியும். கால்பந்து? ஒரு இடத்துல ஒருத்தன் நிக்கற கதையில்ல, ஒண்ணரை மணி நேரமும் ஓடிகிட்டே இருக்கணும்? நம்மாளால முடியுமா? அதுதான் நம்மாளு கிரிக்கெட் பக்கம் ஒதுங்கிட்டான்” எனப் பேசிக்கொண்டே “கிரிக்கெட்டின் கடவுள் சச்சின் வாழ்க” என்று முழங்கி அவர் போஸ்டருக்கு பாலாபிஷேகம் செய்யும் கோடானுகோடியில் நானும் ஒருவன்.

எனினும் கிராண்ட்ஸ்லாம் டென்னிஸ் போட்டிகள் வரும் சமயங்களில், மொழி புரியாமலேயே ஹிந்தி படம் பார்ப்பதுபோல், டென்னிஸின் நுணுக்கங்கள் தெரியாமலேயே காலிறுதிக்குப் பின் அத்தனை ஆட்டங்களையும் பார்ப்பவன் நான். காரணம் என்னுடைய பதின்வயதின் தொடக்கத்தில் ஸ்டெப்பி, மோனிகா போன்றவர்கள் எனக்கு அழகிகளாகத் தெரிந்ததும், பதின்வயதின் உச்சத்தில் அன்னா கோர்னிகோவா போன்றவர்கள் ஆடிக் கொண்டிருந்ததும்தான்.

அப்படி ஆரம்பித்த கதை சாம்ப்ராசின் ஏஸ்’களால் ஈர்க்கப்பட்டும் அகாசியின் சர்விஸ் ரிடர்ன்களை ரசிக்கத் தொடங்கியும் செய்தபோது டென்னிஸ் ”விழியில் விழுந்து இதயம் நுழைந்து உயிரில் கலக்கத்தான்”, செய்தது. பெடரர்களும், நாடால்களும் உள்ளே புகுந்தும் கூட சாம்ப்ராஸ் சர்விஸ் எப்படி இருக்கும் தெரியுமா? ஆண்டாள் காண்டி சாம்ப்ராஸைப் பார்த்திருந்தால், “வெள்ளி மலை சாம்பிராஸுனு” தொடங்கி, “தாழாதே ராக்கெட் உதிர்த்த சர மழை போல்”-னு பாசுரம் பாடியிருப்பாங்க. அகாசியோட ஆக்ரோஷம் பாத்திருக்கியா? ”சீரிய சிங்கம் அறிவுற்று தீ விழித்து:-னு ஆண்டாள் இதைப் பற்றித்தான் பாடினாள் என்றொரு பதவுரை கூட சமீபத்தில் பதிப்பித்துள்ளனராம். என பழைய பல்லவி பேசியபடி உண்மையான டென்னிஸ் ரசிகர்களிடம் கொஞ்சம் நிறையவே குட்டுகள் வாங்கி ஆட்டத்தின் நுணுக்கங்களை சுமாரே சுமாராக அப்படியே கற்றுக் கொண்டாயிற்று.

முப்பதைக் கடந்தபின் கற்ற வித்தையை வைத்து ஆடுகளம் இறங்கி ஆடவா முடியும்? நமக்குத் தெரிந்த விஷயம் ஒன்று; அது இங்கிதமே பாராமல் அங்கிங்கெனாதபடி எங்கும் மொக்கை போடுவது. நமக்கென இப்போது கிடைத்த ஆடுகளமாம் “கிரிக்கெட் தவிர”வில் போடலாம் மொக்கை என இங்கேயும் புகுந்துள்ளோம்.

பதினான்கு நாள் திருவிழாவாக  ஆஸ்திரேலியன் ஓபன் டென்னிஸ் மெல்பர்னில் இதோ இன்று துவங்குகிறது. அவங்க அங்கே ஆடட்டும். நாம் இங்கே தினமும் ஆட்டங்களைக் கலந்தாய்வோம்.

பிரெஞ்சு, விம்பிள்டன் , அமெரிக்கன் ஓபன் என மூன்றையும் தொடர்ச்சியாக வென்றுவிட்டு ஆஸ்திரேலியன் ஒபனையும் வெல்ல நாடால் உள்புகுகிறார் என்பது நம்மில் பலர் அறிந்த சேதி. பைனல் ‘ல யாருங்க வேணும்? பெடரரா? 

ஆஸ்திரேலியன் ஓபெனில் முதல் முறையாக பங்கேற்கப் போகும் நம்மாளு சொம்தேவுக்கு முதல் சுற்றில் ஸ்பெயின் வீரர் ஒருவருடன் மோதல். பார்ப்போம் இந்த தபா தலை என்ன பண்ணுதுன்னு! லியாண்டர் மகேஷ் ஜோடி நீண்ட இடைவெளிக்குப் பின் ஆஸ்திரேலிய ஓபெனில் இணைகிறார்கள். எதிர்பார்ப்போம்.

ஊப்ஸ்! சானியாவை இந்த இந்தியா மறக்கலாம். நாம் மறக்கலாமா? அம்மையாரும் போராடி உள்ளே நுழைந்திருக்கிறார். அவருக்கும் “எதிர்பார்ப்போம்” என்று ஒரு கார்டு போட்டு வைப்போம். சானிய முதல் சுற்றில் சந்திக்கவிருப்பது யாருமில்லீங்க ஜஸ்ட் நம்ம முன்னாள் நம்பர் ஒன் ஜஸ்டின் ஹெனினை.

லலிதாராம், நட்பாஸ் போன்ற ஜாம்பவான் விமர்சகர்களுடன் இந்தத் தக்குனூன்டு பாண்டியம் கிரியும் இணைகிறேன். இந்த முறை ஆஸ்திரேலிய ஓபன் கவரேஜின் திருஷ்டியாக என்னை லலிதாராம் இங்கே இலவச இணைப்பாக இணைத்திருக்கிறார்.

இட்டபணியை இனிதே முடிப்பேன் என்ற வாக்குறுதியுடன்,

உங்கள் அன்பன்,

கிரி

 

வசீகரன் vs எந்திரன்

எப்போதும் வசீகரனாயிருக்கிற பெடரர், யாராவது மென்னியைப் பிடித்து அழுத்த ஆரம்பித்தால் எந்திரனாக மாறி விடுகிறார். அதற்காக அக்கம் பக்கத்தில் பந்து தருகிற பெண்களைப் பார்த்து வில்லத்தனமாய் சிரிக்கிறார் அவர் என்று சொல்லவில்லை- பெடரரின் ஆட்டத்தில் ஒரு இரும்புத்தனம் வந்து விடுகிறது. இது அவரது இயல்பான ஆட்டமா இல்லை இப்போதுதானா இப்படி என்றுத் தெரியவில்லை- பெடரரின் ஸ்க்ரூக்களை டைட் பண்ணினால் அவர் ரொம்ப ஜாக்கிரதையாக பந்து வெளியே போய் விடக் கூடாதே என்ற கவனத்துடன் பொத்தாம் பொதுவான ஷாட்களை ஆட ஆரம்பித்து விடுகிறார். வழக்கமாக அவரிடமிருந்து பொறி தெறித்தாற்போல வருகிற ஷாட்கள் வருவதில்லை, டல்லடிக்கிறார்.

செப்பியிடம் ஆடியதற்கு அடுத்தது ஸ்வீடன் நாட்டைச் சேர்ந்தே சோடர்லிங். தரவரிசையில் பெடரருக்கு இரண்டு இடம் கீழே, ஐந்து. நல்ல விறுவிறுப்பான ஆட்டமாக இருக்கும் என்று நினைத்துக் கொண்டு டிவியை ஆன் செய்தேன். இரண்டு பேரும் ப்ராக்டிஸ் பண்ணி முடித்துவிட்டு மேலே போட்டிருந்த கோட்டைக் கழட்டி கோதாவில் குதிக்கும் தருணத்தில், “காலங்காத்தால சரஸ்வதி பூஜையும் நாளுமா நல்லதா ரெண்டு சாமி பாட்டு கேக்கறதுக்கு இல்லாம எப்பப்பாரு ஸ்டார் ஸ்போர்ட்ஸ்தானா?” என்று பின்பாட்டு கேட்டது. நியாயம்தானே?

சரி, டயத்தை ஏன் வீணாக்க வேண்டும் என்று கடைக்குப் போய் விட்டுத் திரும்பி வந்து, ஒரு வழியாக வீட்டில் கவனம் வேறு பக்கம் திரும்பியிருந்த சமயம் பார்த்து சத்தமில்லாமல் சேனல் மாற்றினால், பெடரர் 6-1, 5-1 என்ற நிலையில் செர்வ் செய்துக் கொண்டிருக்கிறார். சரிதான், இதைப் பார்ப்பதற்காக பழைய பாட்டையே மறுபடியும் கேட்கணுமா என்று தெய்வீக ராகங்களுக்குத் திரும்பி விட்டேன்.

சரியாக ஐம்பத்து மூன்று நிமிடங்களில் மொத்த ஆட்டத்தையே முடித்திருக்கிறார் பெடரர். அவரோடு ஆடியது உலகத்தில் ஐந்தாம் நிலையில் இருக்கிறவர். நல்ல பார்மில்தான் பெடரர் இருக்கிறார் என்று சொல்லத் தோன்றுகிறது.

அரை இறுதி ஆட்டதையாவது பார்ப்போம் என்று காத்திருந்து சாயந்தர வேளையாய் இருந்தாலும் பரவாயில்லை என்று செய்ய வேண்டிய வேலையை எல்லாம் முன்கூட்டியே முடித்துக் கொடுத்துவிட்டு ரிலேக்சாக ஜோகோவிச் பெடரர் ஆட்டத்தில் உட்கார்ந்தேன்.

இந்தப் பதிவின் துவக்கத்தில் எந்திர முகம் என்று சொன்னேனல்லவா, அது இரண்டாம் ரேங்கில் இருக்கிற ஜோகொவிச்சைப் பார்த்த பீதியிலேயே பெடரருக்கு வந்து விட்டது. மனுஷன் சாதாரண நாளிலேயே அதிகம் அலட்டிக் கொள்ள மாட்டான், அவங்க ஊர் வாட்ச் கால் முளைத்து கோர்ட்டுக்குக்கு வந்த மாதிரிதான்- அதன் ஆர்ப்பாட்டமில்லாத துல்லியம்தான் பெடரரின் ஸ்டைல். ஆனால் ஜோகோவிச் போன்றவர்கள் ஏமாந்த சமயம் பார்த்து பதம் பார்த்து விடுகிறார்கள் என்பதால் முதலிலிருந்தே பெடரர் ரொம்ப உஷாராக ஆடினார்.

அது ஏதோ கையைக் கட்டிக் கொண்டு சண்டை போடுகிற மாதிரி இருந்தது= பெடரரின் சர்வீசில் நீண்ட ராலிகள், தெரியாத்தனமாய் செய்யப்படுகிற பிழைகளை பொளேர் என்று இவர்களில் ஒருத்தர் வின்னராகக் கன்வர்ட் பண்ணுவார். பெரும்பாலும் அது ஜோகொவிச்சாகத்தான் இருக்கும். பெடருக்கு பர்ஸ்ட் சர்வ் கூட அவ்வப்போது கைவிட்டுப் போனது. ரொம்ப போராடினார் அவர்.

ஜோகோவிச் ஒரு வித்தியாசமான ஆள். அதிகம் அலட்டிக் கொள்வதில்லை. முன்னெல்லாம் இவர் களத்தில் செய்கிற கோணங்கிச் சேட்டைகள் ரொம்ப பிரபலம்.

ஜோகொவிச்சின் கைதான் முதல் செட்டில் ஓங்கியிருந்தது. நான்காவது கேமில் ஜோகோவிச் ஒழுங்காக ஆடியிருந்தால் ரிசல்ட் வேறு மாதிரி வந்திருக்ககூடும். அவருக்கு நான்கு ப்ரேக் பாயிண்டுகள் கிடைத்தன. அத்தனையையும் பெடரர் எந்திரத்தனமான ஆட்டத்தினால் தாக்குப் பிடித்தார். அது தவிர இரண்டு தடவை பெடரர் கேமை எடுக்க சர்வ் செய்தபோது ஜோகோவிச் அவரை முறியடித்தார். இந்த கேம் மட்டும் பன்னிரெண்டு நிமிடங்கள் நடந்தது.

இதற்கு முந்தைய ஆட்டத்தில் பெடரர் சொடர்லிங்கை ஐம்பத்து மூன்றே நிமிடங்களில் தோற்கடித்திருந்தார் என்பதை நினைத்துப் பாருங்கள். பெடரர் பட்ட பாடு புரியும்.

எட்டாவது கேமில் ஜோகோவிச் ரொம்ப சீக்கிரமாகவே 0-30 என்று பெடரரைத் பிரேக் பண்ண முக்கால் கிணறு தாண்டி விட்டார்- திடீரென்று விழித்துக் கொண்ட மாதிரி பெடரர் ஒரு பிரமாதமான ஏஸ் அடித்தார், அடுத்ததாக ஜோகொவிச்சைப் பின்னுக்குத் தள்ளி விட்டு சாட்டையால் சொடுக்குகிற மாதிரி ஒரு க்ராஸ் கோர்ட் வாலி- ஜோகோவிச், “என்னடா மனுஷன் இவன்!” என்கிற மாதிரி பெடரரைக் காட்டி பார்வையாளர்களைப் பார்த்து முகம் சுளித்தார். பத்தாவது கேமில் பெடரர் ஏறத்தாழ இதே மாதிரியான கட்டத்தில் ட்ராப் ஷாட் ஆடினார். ஜோகோவிச் அதை நோக்கி ஒரு அடி கூட எடுத்து வைக்கவில்லை. மாறாக தனது மட்டையில் கையைத் தட்டி கரவொலி எழுப்பினார்.

அதற்கு அடுத்த இரண்டு பாயிண்டுகள் கழித்து ஜோகோவிச்கூட அதைவிட நல்ல ஒரு ட்ராப் ஷாட் ஆடினார். பெடரர் ஜோகோவிச்சை நிமிர்ந்தும் பார்க்கவில்லை, அடுத்த பந்தை எதிர்கொள்வதற்காகப் போய்க கொண்டே இருந்தார். அடுத்த ஒன்றிரண்டு பாயிண்டுகளை ஜோகோவிச் சொதப்பவே, பெடரர் அவரை ப்ரேக் பண்ணி விட்டார்.

எந்திரனுக்கு லீவு கொடுத்துவிட்டு வசீகரன் அந்த இடத்துக்கு வந்தார். அதற்கப்புறம் ஜோகோவிச்சை ஊதித் தள்ளிவிட்டார் பெடரர்.

முதல் செட்டை மட்டும்தான் பார்த்தேன். அது முடியும் வேளை எங்கள் வீட்டுக்கு கொலு பார்க்க என் அத்தை வந்து விட்டார். அவர் ஒரு அரை மணி நேரத்துக்குக் கச்சேரி செய்தார். சக்கரம் இறங்க மறுக்கிற விமானம் மாதிரி லேண்டிங் நோட்களை ஒட்டி அவர் செய்த அசாத்திய சஞ்சாரம் குறித்து சொல்லியே ஆக வேண்டும்…

ஆனால் அதற்கான இடம் இது இல்லை என்று நினைக்கிறேன்.

அதற்கான ஆளும் நான் இல்லை.

அது கிடக்கட்டும், யார் ஜெயித்தது என்று சொல்லாவிட்டால் கோபித்துக் கொள்ளப் போகிறீர்கள்- பெடரர் 7-5, 6-4 என்று ஜெயித்து விட்டார். இறுதிப் போட்டியில் ஆண்டி மர்ரேவை எதிர்த்து ஆடுகிறார்.

இவர்கள் இருவரும் ஆடிய ஆட்டங்கள் பன்னிரெண்டு. அவற்றில் ஏழு போட்டிகளில் மர்ரே ஜெயித்திருக்கிறார். வரட்டும் பார்க்கிறேன், என்று சொல்லியிருக்கிறார் அவர்.

என்ன நடக்கிறது பார்க்கலாம். நீங்களும் நாளை வாருங்கள்- வேறு எங்கேயும் போய் விடாதீர்கள்.

– நாட்பாஸ்

************************************
இதை நாட்பாஸ் அனுப்பி 2-3 நாளாயிற்று. இணையத்தில் தொற்றிக் கொள்ள இப்போதுதான் நேரம் கிடைத்ததால், இப்போதுதான் வலையேற்ர முடிந்தது. பதிவில் ஊசிப் போன வாடை அடித்தால் அதற்கு முழு பொறுப்பு என்னுடையதுதான்.

போட்டியில் இறுதியாட்டத்தில் மர்ரே சுலபமாக வென்றார். ”செங்கல்பட்டு அருகில் இருக்கும் ஷாங்காயில் ஜெயிப்பதெல்லாம் மேட்டரே இல்லை. கிராண்ட் ஸ்லாமில் ஜெயித்தால்தான் ஆட்டத்தில் சேர்த்தி என்கின்றனர்”, தீவிர ஃபெடரர் ரசிகர்கள்.

காமன் வெல்தில் கோட்டை விட்ட பட்டத்தை ஷாங்காயில் வென்றுள்ளார் லியாண்டர். இப்படியே ‘தம்’ கட்டினால் 2012-ல் ஒலிம்பிக் வந்துவிடும். இம்முறையாவது உலோகம் (இரட்டையரில்) கிட்டும் என்று நம்புவோமாக.

– லலிதாராம்

************************

 

செப்பிடுவித்தை

இஸ்னர் பார்ப்பதற்கு சாதுவாக இருக்கிறார் என்று சொன்னேனல்லவா, நேற்று பெடரரோடு ஆடிய செப்பியை அப்படி சொல்ல முடியாது. செப்பியிடம் உங்கள் பெண்டாட்டியை என்ன, பூனைக் குட்டியைக்கூட தனியாக விட்டுவிட்டுப் போவதற்கு ஒருமுறைக்கு இரண்டு தடவை யோசிப்பீர்கள். அவரது பார்வையில் அப்படியொரு முரட்டுத்தனம். முகம்தான் இயல்பிலேயே அப்படியென்றால் கண்டகண்ட இடங்களில் தாடியை வளர்த்து விட்டுக் கொண்டு ஒரு வெறித்தனமான லுக்கை செட் பண்ணி வைத்திருக்கிறார் அவர். ஆனால் அதுவெல்லாம் பெடரரிடம் போணியாகவில்லை.

image credit: Zimbio

முதல் செட் பறி போய் விட்ட நிலையில் இரண்டாவது செட்டில் செப்பி பெடரரை ப்ரேக் செய்தார். அந்த கேமில் செப்பி உண்மையிலேயே மிக சிறப்பாக ஆடினார். பெடரரை இங்கும் அங்கும் ஓட விட்டு அழகாக பாயிண்ட்களை ஸ்கோர் பண்ணினார். ஆனால் அதற்கு அடுத்த கேமிலேயே பெடரர் செப்பியை ப்ரேக் செய்தார். என்ன நடந்தது என்றுத் தெரியவில்லை. இரண்டு பேருமே அந்த கேமை மிக சாதாரணமாகத்தான் ஆடினார்கள். செப்பி இரண்டு தடவையோ என்னவோ நெட்டில் செர்வ் பண்ணினார். அப்புறம் இரண்டு தடவை கோட்டுக்கு வெளியே அடித்தார்.

பெடரர் விசேஷமாக எதுவும் செய்யாமலேயே செப்பியை ப்ரேக் செய்தார் என்றுதான் சொல்ல வேண்டும். அதற்கடுத்த முறை தான் செர்வ் பண்ணும்போது செப்பி 40-0 என்று முன்னே போனார். அப்பழுக்கில்லாத ஆட்டம். ஆனால் அதற்குள் ஏறத்தாழ எல்லாம் முடிந்து விட்டிருந்தது.

செப்பியிடம் பிரம்மாஸ்திரம் என்று சொல்லும்படியாக ஒரு ஷாட்டும் இல்லை. அதுதான் அவரது பிரச்சினை. ரோடிக் போன்றவர்கள், அவசர ஆத்திரத்தில் முயல்குட்டியை தொப்பியில் இருந்து தருவிக்கிற மந்திரவாதி மாதிரி ஏஸ்களை ஏவக்கூடியவர்களாக இருக்கிறார்கள். சில பேருக்கு பேக்ஹேண்ட் பலமானதாக இருக்கிறது, சில பேருக்கு கிரௌன்ட் ஸ்ட்ரோக் என்று ஏதேதோ. ஆனால் செப்பி தனக்கு வருகிற பந்துகளைத் திருப்பி அடிக்கக் கூடியவராக இருக்கிறார், அவ்வளவுதான். நீண்ட ராலிகளில் அவருக்கு ஜெயிக்கக் கூடிய வாய்ப்புகள் கூடுகின்றன. ஆனால் ஒரு ஏஸ்கூட அடிக்காமல் இந்த காலத்தில் பெரிய பெரிய ஆட்களிடம் டென்னிஸ் மேட்ச்களை ஜெயிக்க முடியாது. பெடரர் கூட என்னதான் நளினமாக ஆடினாலும், அவ்வப்போது சிதறுதேங்காய்மாதிரி பட்டுத் தெறிக்கிற ஏஸ்களை வீசவே செய்கிறார், இல்லையா?

செப்பி இன்னும் நன்றாக ஆடக் கூடியவர் என்று நினைக்கிறேன், இந்த ஆண்டு இறுதியில் அவரது ரேங்க் முதல் முப்பதுக்குள் வந்தாலும் ஆச்சரியப்படுவதற்கில்லை. ஆனால் அதற்கு அவர் இன்னும் நிறைய தூரம் போக வேண்டும். முக்கியமாக, பெடரர் போன்றவர்களை ப்ரேக் பண்ணியதும் கவனத்தை சிதற விடக் கூடாது. அதே மாதிரி, முகத்தில் இருக்கிற வெறித்தனத்தை ஆட்டத்திலும் காட்ட வேண்டும்.

ஒரு தடவை அவரது நெருங்கிய நண்பர் ஒருவரிடம் ஒரு ஆட்டத்தில் 6-1 5-3 என்று லீட் பண்ணியிருந்தும் தோற்றுப் போனாராம். “ஏன் இப்படி ஆனது?” என்று நிருபர்கள் அவர்களிடம் கேட்டதற்கு, “தலைவலி, வயிற்று வலி” என்று ஏதாவது சாக்கு சொல்லியிருந்தால் பரவாயில்லை, “அதுவா, இதுக்கு பதில் சொல்றது ரொம்ப ஈஸி. நான் அவனைத் தோக்கடிச்சுட்டா அப்புறம் இந்த வருஷம் புல்லா யாரு நான் பாக்க படம் குடுப்பா?” என்று பதில் சொன்னாராம் செப்பி. விக்கிப்பீடியாவில் படித்தேன்.

போயும் போயும் திருட்டு டிவிடிக்கா ஆசைப்பட்டாய் பாலகுமாரா’ன்னு கேக்கத் தோணுது, இல்லியா? இவ்வளவு நல்லவனா இருந்தா வேலைக்காவாது.

————————

சற்று முன் கிடைத்த தகவல் படி உலக நம்பர் 1 ஆட்டக்காரர் நடால் ஷாங்காய் மாஸ்டர்ஸில் அதிர்ச்சி தோல்வியுற்றார். வீட்டில் சாயங்கால வேளையாய்ப் பார்த்தி, கிழக்கு பார்க்க உட்கார வைத்து மிளகும், உப்பும் சுற்றிப் போட்டால் எல்லாம் சரியாகிவிடும் என்கிறாராம் நடாலின் பாட்டி.

—————————–

நேற்று பெடரர் இஸ்னரோடு ஆடியபோது அவரது மேஜிக் ஷாட்டை ஆடினார். அதன் காணொளி இன்றுதான் கிடைத்தது- கண்டு களியுங்கள்:

– நாட்பாஸ்

 

ப்ரேக் பாயிண்ட்

இன்றைக்கு காலையில் கறிகாய் வெட்டும்போது பெடரரும் இஸ்னரும் மோதிய ஆட்டத்தைப் பார்க்க நேர்ந்தது. மோதல் என்று சொல்வது கொஞ்சம், கொஞ்சமென்ன நிறையவே அதிகப்படிதான்- தன் கல்யாணத்திலே தான் மாப்பிள்ளையாக இல்லாத ஒருவனைப் போல் இருந்தார் இஸ்னர். இஸ்னரை டென்னிஸ் ரசிகர்கள் சுலபத்தில் மறந்துவிட முடியாது. போன விம்பிள்டனில் மஹூட்டுக்கு எதிரான ஆட்டத்தை11 மணி நேரத்துக்கு மேல் விளையாடி சாதனை படைத்தவர்.

ஆள் நல்ல உயரம்- எக்காரணத்தினாலோ அவரது தோற்றம் எனக்கு வைல் ஈ கொயோட்டை நினைவு படுத்துவதாய் இருந்தது.

image credit: Bite

இஸ்னரின் உயரம் எழடிக்கும் கொஞ்சம் கீழே, ஒரு மூன்று அங்குலம் கம்மி. உயர்ந்து இருந்தாலும் அதற்குத் தகுந்த பரப்பு வளர்ச்சி இல்லை. இவர் இன்னும் ஒரு நாற்பது அல்லது ஐம்பது கிலோ எடை கூட இருந்திருந்தால் இருந்திருந்தால் ரசிக ரசிகைகளின் இதயத்தில் இடம் பிடித்திருக்கக் கூடும். ஆனால் ஒல்லியாக ஒட்டடைக்குச்சி போல் இருப்பதால், பாவம், இவருக்குப் பரவலான ரசிகர்கள் இல்லை. என்ன ஒன்று, டென்னிஸ் விளையாடக் கடும் பயிற்சி எடுத்ததாலோ என்னவோ, இவரது தோள்கள் இரண்டும் நன்றாக விரிந்திருக்கின்றன. அதிலிருக்கிற சக்தியைத் திரட்டி வலுவான ஏஸ்கள் அடிக்கிறார். சர்வீஸ் போடும்போது பரவாயில்லையாய் இருக்கிற இவரது ஒல்லியான உடலும் விரிந்த தோளும், டென்னிஸ் கோர்ட்டில் பரபரப்பாக ஓடும்போது சிறகொடிந்த ஆஸ்ட்ரிச்சை நினைவு படுத்துகின்றன. “ஆஸ்ட்ரிச் ஓடி நீ எங்கப்பா பாத்தே?” என்றெல்லாம் அபத்தமாகக் கேட்கக் கூடாது. நான் இஸ்னர் ஓடிப் பார்த்திருக்கிறேன்.

image credit: New Balls, Please.

நான்தான் இதை எழுதிக் கொண்டிருக்கிறேனே தவிர, பெடரர் இந்த மாட்சை இஸ்னருடன் கை குலுக்கிய அடுத்த நிமிடத்திலேயே மறந்திருப்பார். இஸ்னருக்கும் இன்னும் இரண்டு மூன்று தடவை பெடரரோடு மோதினால் இந்த மேட்சில் குறிப்பிடும்படியாக எதுவும் நினைவிருக்கப்போவதில்லை. எந்த வகையிலும் முக்கியமாய் இல்லாத ஆட்டம் இது.

இருந்தாலும் நான் பெடரர் எப்படி ஆடுகிறார் என்பதற்காகவே இந்த ஆட்டத்தைப் பார்த்தேன். இஸ்னரும் முடிந்த வரை ஈடு கொடுத்துதான் ஆடினார். டென்னிஸ் தரவரிசையில் இருபதாவது இடத்தில் இருக்கிறார், அவரைப் பற்றி அலட்சியமாய்ப் பேசிய வாய்க்கு சோறு கிடைக்காது. இருந்தாலும் பாருங்கள், ரெண்டு பேருக்கும் மேட்ச் ஆகவே இல்லை.

பெடரர் தினமும் அலுவலகத்துக்குப் போய் பைலைப் புரட்டும் குமாஸ்தாக்களின் ஆபிசர் போல் சுரத்தே இல்லாமல் “நெக்ஸ்ட், நெக்ஸ்ட்” என்றபடி அடுத்தடுத்து பந்துகளை டிஸ்போஸ் செய்து முடித்தார்.. இஸ்னராவது கொஞ்சம் வெறியோடு ஆடியிருக்கலாம். அவரும் பாலோ பண்டினி கார்டியனில் செய்த லைவ் பிளாக்கிங்கை படித்திருந்தாரோ என்னவோ, ஜாம்பியாகவே மாறி விட்டார்.

இரண்டாவது செட்டில் இரண்டு-இரண்டு என்ற நிலையில், ஒன்று நிகழ்ந்தது. அதை நான் பார்த்திருக்காவிட்டால் இப்படி பதிவு எழுதிக்கொண்டிருக்க மாட்டேன்.

இஸ்னர் அழகாக பெடரரின் களப்பரப்பின் வலது மூலைக்கு ஒரு பந்தை அடித்தார். நாமாக இருந்தால் நின்ற இடத்திலேயே உறைந்திருப்போம். பெடரரோ நாலு கால் பாய்ச்சலில் அதைத் தாவிப் பிடித்து அடித்து விட்டார்- ஆனால் பாருங்கள், அதற்குள் இஸ்னர் சுறுசுறுப்பாக நெட்டுக்கு அருகில் வந்து விட்டிருந்தார். என்ன இருந்தாலும் உலகின் இருபதாவது ரேங்க் வீரராயிற்றே, இந்த மாதிரி எத்தனை பேரைப் பார்த்திருப்பார்!

பெடரர் இஸ்னரைப் பார்த்தாரோ இல்லையோ தெரியாது, பார்த்திருக்காவிட்டாலும் ஒன்றும் குடி முழுகிப் போயிருக்காது- பெடரர் அடித்த பந்து சல்லிசாக இஸ்னரின் மட்டைக்கு வந்து சேர்ந்தது. நம்மை விடுங்கள், ஏழு வயது குழந்தைக்குக் கூட இந்த மாதிரி சமயங்களில் என்ன செய்ய வேண்டும் என்று தெரியும். பெடரர் களத்தின் வலது மூலையில். நாமோ நெட் அருகில். ட்ராப் ஷாட் ஆடுவதுதானே சரி?

ஆம், துல்லியமாக களத்தின் இடப்பக்கம் கோட்டை ஒட்டி விழுகிற மாதிரி இஸ்னர் பந்தை ட்ராப் செய்தார். நாமும் இஸ்னரும் இப்படியெல்லாம் யோசித்து அதை செய்து முடிப்பதற்குள் பெடரர் நாலு கால் பாய்ச்சலில், வேண்டாம், ஆறு கால் பாய்ச்சலில் அங்கு வந்து விட்டார். ட்ராப் செய்யப்பட்ட பந்து விழுந்து எழுந்து மீண்டும் தரையைத் தொட மிஞ்சிப் போனால் இரண்டு அங்குலம் இருக்கும்- பெடரரைப் பார்த்த அதிர்ச்சியில் உறைந்து நின்று விட்டது.

அப்புறம் என்ன, பெடரர் அதை குறுக்கு வெட்டாக ஒரு இருபது இருபத்தைந்து டிகிரி ஆங்கிளில் ஸ்லைஸ் பண்ணினார். டென்னிஸில் ப்ரேக் பாயிண்ட் ப்ரேக் பாயிண்ட் என்று சொல்வார்களில்லையா, அந்தா ஆட்டத்தில் அதுதான் ப்ரேக் பாயிண்ட். அதற்கப்புறம் இஸ்னர் பெடரர் அடிக்கிற ஷாட்களைப் பார்த்து தலையை ஆட்டிக்கொள்வதும் தனக்குத் தானே சிரித்துக் கொள்வதுமாக ஒரு மாதிரி ஆகி விட்டார்.

மேட்ச் ஓவர்.

— நாட்பாஸ்

 

கொத்து பரோட்டா

இந்த வாரம் விளையாட்டு ரசிகர்களுக்கு எக்கெச்செக்க தீனி.

காமன் வெல்த் ஆட்டங்களில் இந்தியா பட்டையை கிளப்புகிறது. துப்பாக்கி சுடுதலை பார்பதற்கு ஒன்றும் சுவாரஸ்யமாக (எனக்கு) இல்லை என்ற போதும் இந்தியா நிறைய பதக்கங்கள் அள்ளியதைக் குறித்து மகிழ்ச்சி.

எனக்கு சுமாராக விளையாட வரும் ஆட்டம் டேபிள் டென்னிஸ் என்பதால், அதனை விரும்பிப் பார்த்தேன். யான்-ஓவ்-வால்ட்னர் காலத்திலிருந்து டேபிள் டென்னிஸை டிவி-யில் தொடர்ந்து பார்க்கும் பிரகஸ்பதி நானாகத்தான் இருப்பேன்.

90-களில் அவரைப் பற்றி எப்போதாவது ஸ்போர்ஸ்டாரில் வரும் செய்திகளை கத்திர்த்து வைத்துக் கொள்வேன். (அவை எல்லாம் எங்கே போயிற்றோ). இந்த காமன் வெல்த் ஆட்டங்களிலும் டேபிள் டென்னிஸை தொடர்ந்து பார்த்தேன்.

குழு ஆட்டங்களில் ஆண்கள் வெங்கலமும், பெண்கள் வெள்ளியும் வென்றனர். சைனா காமன்வெல்தில் இல்லாத நிலையில், தங்கமே வென்றிருக்கலாம். தனி நபர் ஆட்டங்களில் அசந்தா ஷரத்கமல் தங்கம் வெல்வார் என்று நம் இக்கை இருந்தது.அவரும் கவுழ்த்துவிட்டார். எதிர்பாரா வண்ணம் சாஹாவுடன் சேர்ந்து ஷரத் கமல் இரட்டையர் பிரிவில் தங்கம் வென்றார். நேற்று இரவு ஹைலைட்ஸ் பார்த்தேன். த்ரில்லிங் ஆட்டம். ஆளுக்கு இரண்டு செட் வென்ற நிலையில், சாஹா அற்புதமாய் பல அதிரடி ஷாட்கள் ஆடினார். 11-8 என்று கடைசி செட்டை வென்று இன்னொரு தங்கம் இந்தியாவுக்குக் கிடைக்கச் செய்தனர்.

ஹாக்கியிலும், edge of the seat thriller. சினிமாவில் வருவது போல, கடைசி நிமிடம் வரை பின் தங்கி இருந்து, 1-3 deficit-ஐ நீக்கி, பினால்டி ஸ்ட்ரோக்கில் ஒரு கோல் வித்தியாசத்தில் இந்தியா வந்தது. ஷாருக் கான் கேமிராவை கொண்டு வந்திருந்தால், சக்-தே இந்தியா பட ஷூட்டிங் செலவு மிச்சமாயிருக்கும். இந்தியா முதன் முரையாய் இறுதி ஆட்டத்துக்குச் செல்கிறது. ஆஸ்திரேலியாவை வெல்வது கடினம் என்றாலும், India have nothing to lose என்பதால் கவலையின்றி ஆடலாம். ஒருவேளை ஜெயித்தாலும் ஜெயிக்கலாம்.

பேட்மிண்டன் அரை இறுதியில் பெண்கள் ஒற்றையர் பிரிவில் சாய்னாவும், இரட்டைஅய்ர் பிரிவில் ஜ்வாலா-அஸ்வினி ஜோடியும் தகுதி பெற்றிருக்கிறது. காட்டிய கொஞ்ச நேரத்தில் இரட்டையர் ஆட்டம் பார்க்க படு சூப்பராய் இருந்தது. வழக்கமாய் ஜ்வாலாதான் அதிரடியில் இறங்குவார். அரை இறுதியில் அஸ்வினி சரமாரியாய் ஸ்மாஷ்களை அள்ளி வீசினார்.

சிங்கபூர் ஜோடியிடம் ஏற்கெனவே குழு ஆட்டங்களில் தோற்றிருந்தாலும், இப்போது ஆடுவது போலத் தொடர்ந்தால் நிச்சயம் தங்க மங்கைகள் ஆகலாம்.

ஒற்றையர் பிரிவில் சாய்னா அரை இறுதியில் சுலபமாக வென்றாலும், ஆட்டத்தில் zing மிஸ்ஸிங். அதிகம் அலட்டிக் கொள்லாமல் ஆடியது போலவே தோன்றியது. முன்பு நடந்த ஆட்டத்தில் போராட்டத்துக்குப் பின் தோற்ற மலேசிய வீராங்கனை வாங் மியூ சூ, இப்போது அடி பட்ட புலியாய் சீறுவார். சாய்னா பழைய துல்லிய ஆட்டத்துக்குத் திரும்பாவிடில் தங்கம் இழக்கும் வாய்ப்பும் உள்ளது.

இங்கிலாந்தும் இந்தியாவும் இரண்டாவது இடத்துக்கு மயிர்பிடி சண்டை போட்டுக் கொண்டிருக்கும் நிலையில், ஒவ்வொரு தங்கமும் மிக மிக முக்கியமானவை.

தங்கம் என்றதும் நினைவுக்கு வருவது தடகள தங்கங்கள்தான். இம்முறை இந்தியாவுக்கு டிஸ்கஸ் த்ரோ மற்றும் 400 மீட்டர் ரிலே ஓட்டம் இரண்டிலும் தங்கம் கிடைத்துள்ளது. டிஸ்கஸில் மூன்று பதக்கங்களையுமே இந்தியர்கள் வென்றுள்ளனர். அதற்கு காரணம் அவர்கள் வீட்டில் கோபத்தில் புருஷன்மார்களை நோக்கி பாத்திரங்களை வீசுவதுதான் என்று ஒரு வதந்தி உலவுகின்றது. ரிலே ரேஸும் பார்க்க விறுவிறுப்பாய் இருந்தது, முதல் இரண்டு leg-ல் பின் தங்கி இருந்த இந்திய அணி, மூன்றாவதில் விட்டததைப் பிடித்து, நான்காவதில் கிடைத்ததைத் தக்க வைத்து தங்கத்தை வென்றது.

கிரிக்கெட்டே கதி என்ற நாட்டில், இது போன்று மற்ற ஆட்டங்களில் உழைத்து, வெற்றியும் பெரும் இவர்களைப் பொன்றவர்களை எவ்வளவு போற்றினாலும் தகும். ஜாவா கோர்ஸ், கமாஸில் ஜாவளி, நுனி நாக்கு ஆங்கிலம், அமெரிக்க மாப்பிளை என்று வாழ்க்கையை பிளான் செய்து கொள்ளாமல், சொந்த முயற்சியினால் இது போன்ற தடகள ஆட்டங்களில் தீவிரமாய் ஈடுபடும் வீராங்கனைகளுக்கு ஹாட்ஸ் ஆஃப்.

காமன்வெல்த் தவிர, தலைவர் ஆனந்த் பில்போ-வில் ஆடிக் கொண்டிருக்கிரார். கார்லசனை வென்றதன் மூலம், தற்போதைய தர வரிசையில் உலக நம்பர் 1 ஆகவும் விளங்குகிறார். இதுவரை நடந்த ஆட்டங்களில் 1 வெற்றியும் மூன்று டிராகளும் பெற்று இரண்டாம் இடத்தில் உள்ளார். கிராம்னிக் இரண்டு வெற்றிகள் பெற்று முதல் இடத்தில் உள்ளார்.

கார்ல்சன் சொதப்பலாய் ஆரம்பித்தாலும், இப்போது நன்றாக ஆட ஆரம்பித்துள்ளார். ஷுரோவுடனான ஆட்டம் 175 நகர்த்தல்கள் வரை சென்றது. பல நேரங்களில் கார்சனின் கை ஓங்கி இருந்த போதும், அதை வெற்றியாக்க முடியாமல் போனது. நேற்ரைய ஆட்டத்தில் one-pawn-down நிலையிலும், end game பிஸ்தாவான கிராம்னிக்கிடம் மிகவும் போராடி டிராவைப் பெற்றார். 2009-ல் தொட்டதெல்லாம் தங்கமான கார்ல்சனுக்கு, இந்த வருட ஒலிம்பியாடும், பில்போ மாஸ்டர்ஸும் சறுக்கல்கள்தான். மாடலிங்கில் கவனம், டீனேஜுக்குரிய கவனச் சிதறல்கள், over confidence, திமிர்த்தனன் என்று பல காரணங்களை ரசிகர்கள் கார்ல்சனின் சரிவுக்குக் காரணமாகக் கூறுகின்றனர். சரிவு வராத ஆட்டக்காரரே கிடையாது. இதெயெல்லாம் கார்ல்சன் பொருட்படுத்த மாட்டார் என்றே நினைக்கிறேன். இந்த வருடம் போனால் அடுத்த வருடம். அவருக்கென்ன வயசுக்கா பஞ்சம்?

கலியுக பிரத்யட்ச அவதாரம் என்று பலரால் கன்னத்தில் போட்டுக் கொள்ளப்படும் திருவாளர் ரொஜர் ஃபெடரர் மகராஜ், ஷாங்காயில் ஆடிக் கொண்டிருக்கிறார். எப்படியோ நல்ல படியாய் ஆடி, அடுத்த வருட கிராண்ட் ஸ்லாம் போட்டிகளை இன்னும் சில பட்டங்களை வென்று, குறிப்பாய் சம்பிராஸின் விம்பில்டன் ரிக்கார்டை உடைக்க வேண்டி பலர் பூ மிதிக்கு வேண்டிக் கொண்டிருப்பதாக நம்பவே முடியாத வட்டாரச் செய்திகள் கூறுகின்றன.

 

ரஷ்யாவின் தங்க மங்கைகள்

கிரிக்கெட் தவிர இன்று முதல் கூட்டுப் பதிவாகிறது. முதல் கூட்டாளி நண்பர் நாட்பாஸ் (என்னும் நடராஜன் பாஸ்கரன்). வெகு நாட்களாக அவரது வலைப்பூவில் கலக்கி வருபவர். இங்கும் அடிக்கடி எழுதவுள்ளார். என்னைப் போல மொக்கையாய் ஆட்டத்தைப் பற்றி மட்டும் எழுதாமல், படிக்கவும் பார்க்கவும் வெகு சுவாரஸ்யமாக இருக்கும் படி பதிவிடுவதில் வெகு சமர்த்தர்

வாங்க தல! கலக்கிப் போடுங்க.

ரஷ்யா மகளிர் டென்னிஸ் ஆட்டத்தில் தங்க மங்கைகளை அள்ளித் தருகிறது, தினம் இரண்டு பேர் நம் கவனத்தை கவருபவர்களாக இருக்கிறார்கள். உலகெங்கும் இருக்கிற மகளிர் டென்னிஸ் விளையாட்டைத் தொடர்ந்து கண்டு களிக்கிற ரசிகர்கள் ரஷ்யாவுக்கு ரொம்பவே கடமைப்பட்டவர்கள்.

இவர்களின் வெற்றிக்குப் பின்னால் அசாதாரணமான கடின உழைப்பு இருக்கிறது. அதைப் பத்திப் படிச்சுத் தெரிஞ்சுக்க ஆர்வம் இருக்கறவங்க இங்கே படியுங்கள்- Tennis Now, Washington Post. அப்படி இல்லையா, மகளிர் டென்னிஸை வெறித்தனமா பாக்கறவங்க எல்லாரும் அடுத்த பத்தியைத் தாண்டி குதிச்சு உங்களுக்காக நாங்கள் தொகுத்து வைத்திருக்கும் டாப் பிப்டியில் உள்ள ரஷ்ய வீராங்கனைகளின் படங்களை மட்டும் பார்க்கவும்.

நேற்று ரஷ்யாவில் பிறந்து ஆஸ்திரேலியாவில் செட்டில் ஆகி இருக்கிற Anastasia Rodionova, இந்தியாவில் பிறந்து பாகிஸ்தானில் செட்டில் ஆகி இருக்கிற சானியா மிர்ஸாவை தோற்கடித்துத் தங்கக் கோப்பையைத் தட்டிச் சென்றார். இறுதிப் போட்டியில் சானியாவின் ஸ்கோர்- 6-3, 2-6, 7-6 (7/3).

இவர்தான் Anastasia Rodionova:

மகளிர் டென்னிஸ் தரவரிசையில் முதல் அம்பது பேரில் ரஷ்யப் பெண்கள்-

4. Vera Zvonareva

9. Elena Dementieva

12. Svetlana Kuznetsova

17. Nadia Petrova

19. Anastasia Pavlyuchenkova

21. Maria Sharapova

26. Maria Kirilenko

27. Alisa Kleybanova

43. Ekaterina Makarova

50. Dinara Safina

சரியாக இருபது சதவிகிதம் ரஷ்யப் பெண்கள். இவர்களைத் தவிர கொஞ்சம் வெளியே-

56. Alla Kudryavtseva

இப்படி ஒரு பெரும் படையே ரஷ்யாவில இருந்து கிளம்பி வந்து உலகத்தை மிரட்டிக்கிட்டுருக்கு. இவங்களுக்கு எதிரா நாம என்ன விளையாடி என்னத்த ஜெயிக்க!

சானியா மிர்ஸா

ரஷ்யாவில் பிறந்திருந்தா நான் கூட மிஹைல் லேர்மாண்டோவ் போல் ஓர் உன்னத கவிஞன் ஆகி இருப்பேன்!

– நாட்பாஸ்

 

US Open Round Up

அமெரிக்க ஓபன் நடந்த இரு வாரங்களிலும், பெரும்பாலான இரவுகளை ஆட்டங்களைக் கண்டே கழித்தேன்.

போரிஸ் பெக்கரின் தீவிர விசிறி நான். அவர் ஆடிய காலங்களில், அவரை ஜெயிக்கும் அகாஸியைக் கண்டால் வெறுப்பாயிருக்கும். ஆடிய ஆட்டங்களில் இரந்த முரண் போலவே, இரு ஆட்டக்காரர்களின் பெர்ஸனாலிடிகளுக்குள் இருந்த முரணும், எனக்கு அகாஸி மீதிருந்த வெறுப்பை அதிகரித்திருக்க வேண்டும்.

காலப் போக்கில், பெக்கர் ஓய்வு பெற்றுவிட, அகாஸி தொடர்ந்து ஆடிக் கொண்டிருந்தார். 1998-ல் உலக தர்வரிசையில் 50-க்குப் பின்னால் சென்றவர், மறு அவதாரமெடுத்துத் திரும்பினார். 1999-ல் ஃப்ரென்ச் ஓபனை வென்றூ, நான்கு கிராண்ட் ஸ்லாமையும் வென்ற வீரர்கள் பட்டியலுள் நுழைந்த போது என் எண்னங்கள் மாறத் துவங்கின. அவர் மீதிருந்து வெறுப்பை ஒதுக்கி அவரது ஆட்டத்தை ரசிக்க ஆரம்பித்தேன். டென்னிஸின் தள்ளாத வயதில் 2003-ல் ஆஸ்திரேலியன் ஓபனை வென்ற போது, அவருடைய விசிறியாகவே மாறி இருந்தேன். (அகாஸி தன் கடைசி கிராண்ட் ஸ்லாம் ஆட்டத்தில் B.Becker-இடம் தோற்றார். B for Boris அல்ல Benjamin:-) இது பொன்ற வெத்து டிரிவியாக்கள் ஆயிரக் கணக்கில் நினைவிருக்கின்றன. அவசியமானவைதான் மறக்கின்றன:-))

இதை ஏன் இப்போது சொல்கிறேன்? அப்படிப் பட்ட உணர்வுதான் எனக்கு நடால் மீதும் தொன்றுகிறது.

பெக்கருக்குப் பின் நான் மிகவும் சிலாகித்து பார்த்த ஆட்டக்காரர் ஃபெடரர்தான். தொடர்ந்து வெற்றிகள் பெற்று ‘sense of invincibility’-ஐ உருவாக்கி வைத்திருந்த ஃபெடரரை தரையிறக்க ஆரம்பித்தவர் நடால். இதனாலேயே எனக்கு இவர் மேல் வெறுப்பு. ஒரு விதத்தில், ஃபெடரரின் ஆட்டத்தின் கண்டிராத உயர் பரிமாணங்களை உலகுக்கு காட்டியவர் நடால்தான்.

களி மண் தரையில் நடால் கிங். புல்தரையிலோ ஃபெடரரை மிஞ்ச ஆளில்லை. ஒரு கட்டத்தில், தர்ந்து பல டோர்ணமெண்டுகளில் தொடர்ந்து நடாலுடன், களி மண் தரையிலேயே இறுதிப் போட்டியில் மொத்த் தோற்றுக் கொண்டிருந்தார் ஃபெடரர். அப்பொதெல்லாம், நடாலின் வெற்றிகளை புறங்கையால் ஒதுக்கிவிட்டு, எதிராளியை அவன் விரும்பும் களத்திலேயே மீண்டும் மீண்டும் மோதும் ஃபெடரரின் தைரியத்தை சிலாகித்ததே அதிகம்.

2007-ல் ஹாம்பர்க் ஓபனில் நடாலை களிமண் தரையில் ஃபெடரர் வீழ்த்திய பொது, என் சந்தோஷத்துக்கே அளவில்லை. எதிராளியைத் தவிடு பொடி ஆக்கிவிட வேண்டும் என்னும் ஆக்ரோஷம் நடாலிடம் கொப்பளித்துக் கொண்டே இருக்கும். சின்னச் சின்ன வெற்றிகளைக் கூட விஸ்தாரமாய் கொண்டாடும் இயல்பும் நடாலுக்கு உண்டு. கொலையே செய்தாலும் வலிக்காமல் செய்ய வேண்டும் என்னும் ஃபெடரரின் பாங்குக்கு நேர் எதிர் பாங்கு இது. இவையும் நடால் மேல் இருந்து வெறுப்பிற்கு எண்ணை ஊற்றியிருக்கலாம்.

ஃபெடரர் சாம்பிராஸின் 14 கிராண்ட் ஸ்லாமைத் தாண்டி, All time great, என்று போர்க் ஜாம்பவான்களாலேயே ஒப்புக் கொண்ட போது, என் பார்வையிலும் சில மாற்றங்கள் வர ஆரம்பித்தன.

ஃபெடரர் ரசிகன் என்பதை மீறி ஆட்டங்களை பார்க்க ஆரம்பித்தேன். 99.99% திருப்பி அனுப்ப முடியாத பந்துகளையும் நடால் தன் வேகத்தினால் அடைந்து, தொஇருப்பியனுப்பவதோடல்லாமல், எதிராளி திணரும் விதமாகவும் பந்தைச் செலுத்தும் பாங்கை எத்தனை முயன்றாலும் ரசிக்காமல் இருக்க முடியவில்லை.

பந்தை எதிர் கோர்ட்டுக்குள் அனுப்ப வெண்டும். நம் கோர்ட்டுக்குள் விழுந்ந்தால் எடுக்க வேண்டும். இவ்வளவுதான் ஆட்டம். சொல்வது சுலபம். செய்வது? நடாலுக்குச் சுலபமாய் முடிகிறது.

ஃபெடரரின் கோலோச்சுக்கு முக்கிய காரணம் அவர் உடல். இது வரை, பெரிய அளவில் எந்தக் காயமும் பட்டுக் கொள்ளாமல் உடலை வைத்திருந்த்தாலேயே இத்தனை பட்டங்களை வெல்ல முடிந்திருக்கிரது.

நடாலின் கதை வெறு. ஓட்டத்தை அதிகம் நம்பும் நடாலின் ஆட்டங்களில், உடல் தளர்ச்சி ஏற்படுவதற்கான வாய்ப்புகள் அதிகம்.

2006-ல் அவருடைய பாதங்கள் பழுதடைந்த பொது, இனி அவரால் முன் போல ஓட முடியுமா என்ற சந்தேகம் எழுந்தது. 2009-ல் வந்த முட்டி கோளாரு, அவரை விம்பிள்டனில் ஆட விடாமல் செய்தது.

வீழ்ந்த பின் முன்னை விட வீர்யமாய் எழுவது தமிழ் சினிமாவில் சுலபம். டென்னிஸ் உலகில் துர்லபம். அதைச் செய்து காட்டிய நடாலின் மன உறுதி என்னை அவர் பக்கம் கொஞ்சம் கொஞ்சமாக இழுத்தது.

கால்களா குதிரைகளா என்று பிரித்தறிய முடியா வேகம்! மயங்காமல் என்ன செய்ய?

இந்த ஆண்டில், பிரெஞ்சு ஓபன், விம்பிள்டன், அமெரிக்க ஓபன், மூன்றையும் சுலபமாகவே வென்றுள்ளார். மூன்றும், மூன்று தளங்கள். ஒன்றில் சிறந்தவர்கள் மற்றதில் சோபிப்பது கடினம். உடல் உபாதை, எதிராளியின் சிறந்த ஃபார்ம், ஆட்டத்தில் பின் தங்கியிருத்தல் என்று பல கணங்களில் பல சோதனைகள். அத்தனையையும் மீறி 24 வயதுக்குள் 9 கிராண்ட் ஸ்லாம் பட்டங்களை வென்றிருக்கிறார் நடால். அனைத்து கிராண்ட் ஸ்லாமுடன் சேர்த்து ஒலிம்பிக் தங்கப் பதக்கம் பெறுவதை கோல்டன் ஸ்லாம் என்று குறிப்பர். கோல்டன் ஸ்லாம் வென்ற அகாஸியுடன் இப்போது நடாலும் இணைந்துள்ளார். (ஃபெடரர் ரசிகர்கள், அவர் பெற்ற டபிள்ஸ் ஒலிம்பிக் தங்கத்தை எண்ணி சமாதானப்படுத்திக் கொள்ல வேண்டியதுதான்.)

வேறு வழியே இல்லை. நானும் ஒரு நடால் விசிறி என்று அறிவித்துவிட வேண்டியதுதான்.

Prince Nadal – Take a bow!

நடால் தவிர, இந்த ஆண்டு என்னை மிகவும் கவர்ந்த ஆட்டக்காரர் மோன்ஃபிஸ். இந்த பிரெஞ்சுக்காரர் ஆடுகையில் தெரியும் நளினம் அரியது. நடாலுக்கும், ஜோகோவிச்சுக்கும் ஈடு கொடுப்பது இவருக்குக் கஷ்டம்தான் எனினும், பார்ப்பதற்கு அற்புதமான ஆட்டம். எதிர்பாராத நெரத்தில் நெட்டுக்கு வருதல், கோர்ட்டின் முனையிலிருந்து டிராப் ஷாட் அடித்தல், எதிராளியின் தலைக்கு மேல் உயர்ந்திருக்கும் ராக்கெட்டின் முனையையை உரசியபடி லாப் ஷாட் அடித்தல் என்று பார்க்கப் பரவசமூட்டும் ஷாட்-கள் ஏராளமாய் ஆடுகிறார். இவரும், ராடிக்கை வீட்டுக்கு அனுப்பிய டிப்ஸரவிஷ்-ம் (Tipsarevic) ஆடிய ஆட்டம் பிரமாதமான கிளாசிக்.

‘Super mom’ க்ளைஜ்ஸ்டர்ஸ் போன வருட வெற்றி அதிர்ஷ்டத்தால் வந்ததல்ல என்று நிரூபித்துவிட்டார். முதல் சில ரவுண்டுகளில் கொஞ்சம் சொதப்பினாலும் எதிராளியை விட கம்மியாய் சொதப்பி வெற்றிக்குச் சேதம் வராமல் பார்த்துக் கொண்டார்.

1995-ல் ஸ்டெஃபி-செலஸ் ஃபைனலுக்குப் பின் நடந்த அனைத்து அமெரிக்க ஓபன் இறுதி ஆட்டங்களும், நெர் செட்களில் முடிந்துள்ளனவாம். இந்த வருடம் ஸ்வோனரேவா தோற்றார். பொதுவாகவே ‘Giant Killer’-களுக்கு ஒரு syndrome உண்டு. ஜெயித்தவுடன் ஆடும் அடுத்த ஆட்டத்தில் சொதப்புவார்கள். இம் முறை, நம்பர் 1 சீடிங் பெற்ற வொஸ்நியாகியை வென்ற ஸ்வோனரேவா இறுதிப் போட்டியில் க்ளைஜ்ஸ்டர்ஸுக்கு கஷ்டம் கொடுக்காமல் தோற்றுப் போனார். கடந்த சில வருடங்களில் சோடர்லிங்கும் சில போட்டிகளில் இப்படிச் செய்துள்ளார்.

This might be the most I’ve ever wanted Kim Clijsters to lose serve. She’s such a great person, but this is difficult to watch right now.”

இது one-sided ஆட்டத்தைப் பார்த்த மெக்கன்ரோவின் கமெண்ட்:-)

2005-ல் பட்டம் வென்ற Clijsters, அடுத்த மூன்றாண்டுகளில் டென்னிஸ் ஆடாமல் குடும்ப வாழ்க்கையில் கவனம் செலுத்தினார். 2009-ல் திரும்பிய இவர், விட்ட இடத்திலிருந்து தொடர்வது பெரும் ஆச்சர்யம். ஸ்வோனரேவா Clijsters-ஐ விம்பிள்டனில் வென்றவர். இம் முறை நேர் செட்டில் வென்றது fitting revenge.

This win partly repeats history and mostly creates one!

எக்கெச்சக்கமாய் காற்றடித்த இந்த அமரிக்க ஓபனில் பொதுவாக பெண்கள் பிரிவு ஆட்டங்கள் சுமாராகவே அமைந்தன. காற்றடிக்கும் போது சர்வீஸை பாக்ஸுக்குள் போடவே, பலர் திணறினர்.

ஐந்தாவது செட்டிலும் அமெரிக்க ஓபனில் டை பிரேக்கர் எதற்கு என்று விளங்கவில்லை.

இந்திய பாகிஸ்தான் ஜோடியான போபன்னா குரேஷி ஜோடி, இரட்டையர் பிரிவில் இறுதி ஆட்டம் வரை முன்னேறி பலரை ஆச்சர்யப்படுத்தியுள்ளது. அடுத்து வரும் போட்டிகளில் இவர்கள் ஆட்டங்களையும் பார்க்க வேண்டுக்ம் என்று நினைத்துக் கொண்டேன்.

இந்த வருடத்தில் இனி மாஸ்டர்ஸ் கப் மட்டும்தான் பாக்கி. அதையும் நடால் வெல்வாரா? ஃபெடரருக்கு இது மோசமான வருடம் என்பதோடு சரியா, அல்லது அவரது கிராண்ட் ஸ்லாம் வெற்றிகளை நாம் பார்க்கப் போவதில்லையா? போர்க் போல அதிகம் அடி படாமல் ஓய்வு பெறுவாரா? அல்லது மெக்கன்ரோ, கானர்ஸ் போல, தோற்றாலும் பரவாயில்லை என்று, பல வருடங்கள் ஆடுவாரா?

இப்படிப் பல கேள்விகள். பொறுத்திருந்த பார்ப்போம்.

அதுவரை ஃபெடரர் பெரியாளா, நடால் பெரியாளா என்று இவர் தொடங்கி வைத்திருக்கும் debate-ஐ தொடர்வோம்.